Ba khang ka NGT, nang tih maw sahuh ki khar Assam sha Bhoi

Shillong, 20 Risaw:
Ki nongkhlong maw na jylla Assam kim shym la patiaw ia ka jingkhang ka National Green Tribunal (NGT) bad haduh mynta ka jingtih bad khlong maw ka dang iaid ha ka them Ri-Bhoi.
Ki par maw bad ki kor tyllait maw kiba dei trai ki Khasi ha ki thain Rani Jirang, Ri Bhoi District kim patiaw ia ka jingkhang ka NGT bad  iai bteng ban trei ha ki par maw.
Ha ka jingshisha ki bor synshar District, ki la pynjari da ka kyndon 144 CrCP ban khang ia ka jingtihmaw tih shyiap pathar naba ka pynjot ia ka mariang.Katkum ki thymmei khubor ba la ioh lum la iathuh ba ki dkhar na Assam ki dang iai bteng ban thang bom ha ki par maw ha ka por kynjah briew mynstep ne janmiet, khlem ka jingtip ki trai par .La iathuh ba ki dkhar kim shym kohnguh ia ki trai ba shah kyrteng bad ki iai trei bad ruh ki kitmaw man ka sngi na Jirang sha Assam.La twad jingmut na ki bor Hima ki ong ba kim lah ban tehlakam ia kitei ki dkhar bad la pynpaw ka Hima, ka la duh bun ka khajana na ki parmaw kiba la pyntrei da ki khar Assam ha ki thain Rani Jirang.La iathuh ba ki dkhar ki la trei donbor hi khlem ka jingtip ki trai parmaw, ym tip ki ioh bom (blasting) na ei ban thang haba ki trai par kim don jingtip katba ki dkhar jan man sngi ki thang bom ban pynpra maw.Ka ophis ka tnad khlaw ka sorkar Jylla bad ka KHADC kiba don ha Rani Jirang kim shym bat ne kem ia ki kali kitmaw ne kitdieng kiba la pynkhein ain bad kane ka lah ban don eiei shalyndet halor ka jingioh iaid laitluid kali kitmaw bad kit dieng na Meghalaya sha Assam.
Namar kane ki dkhar ki sdang ban trei donbor bad suki suki kin sa kam trai syndon ia kitei ki par maw, namar ba ki trai par kim lah shuh ban tehlakam ia ki dkhar namar ba ki la ai mon naduh basdang bad hun tang ban shah kyrteng khlem da pynshitom ia lade ban trei hi.