Ba khang jingkieng Umiam, shimpor ar sngi ia ki trok na Guwahati ban poi Shillong, hap shim ruh da ki kali Assam, ban thikna ba kin poi sha Shillong

Shillong:Ka jingkiew dor ki mar ki mata ha ka Jylla ki lah ban bun ka daw, hynrei kawei na kine ki daw ka long namar ka jingbym lah ban pynpoi ia ki mar ki mata lyngba ka Surok kaba ju pyndonkam baroh shi katta ka Surok Guwahati sha Shillong lyngba ka jingkieng umiam, kaba don ha ka thain Ri Bhoi.
Lah ban kdew hangne ba ka jingkieng umiam, kaba la shna ha u snem 1958 bad pyndep ha u snem 1965, kaba la shah ia baroh ki kali ban iaid lyngba na kane ka jingkieng, hynrei ha u 2023, ka Meghalaya Energy Corporation Limited (MeECL) ka la khang noh ban iaid ia ki kali heh na kadaw ba kane ka jingkieng kam long shuh kaba shngain.

Lah ban kdew hangne ba na ka jingbym shah shuh ban iaid ki kali kiba heh ka la ktah pat ha kawei ka liang, khamtam ha ka jingkiew ki dor jong ki marbam mardih kiba dei ban wanrah na Guwahati sha Shillong.
Halor kane ka mat hi la ioh ban iakren ia ki mahajon ki ba la iathuh ba katba dang long ban iaid na jingkieng damsite, ka jinglut ka poi 5 hajar kawei ka truck rit ban pynpoi ia ki marbam mardih na Guwahati sha Shillong, hynrei mynta ka jinglut ka la palat namar ba ki hap ban iaid kyllain na Mawryngkneng.

“Ym tang ba ka don ka jinghap ban pynlut khambun ia ka pisa ban pynpoi mar sha Shillong, hynrei ka don ruh ka jingbam ka por , ha ki por mynshwa ki truck kit marbam mardih ki ju shimpor tang shisngi ban wan na Guwahati sha Shillong, hynrei mynta ki la bam por ar lane lai sngi ban wan na Guwahati sha Shillong lyngba ka Mawrynkneng” ki la ong.
Ki la ong ruh ba ki paidbah ki mad bha ka jingeh na ka jing bym lah shuh ban iaid na ka jingkieng dam namar haba ka dor ban pynpoi mar ka la kiew ka mut, ki mar ki mata ruh hap ban pynkiew. Kane ka wanrah jingeh ia ki nongshong shnong ha ka Jylla, namar ba kin hap ban thied ia ki mar ki mata ki ba ka dor ka ba heh.
“Ka la don ka jingpynkiew ia ka dor ban pynpoi mar bad ka jingkiewdor ki marbam mardih bad ka jingslem ha ka jingpynpoi ia ki mar ki mata na ka jingshah khang ia ka jingkieng dam” ki la bynrap.
Na ka liang ki mahajon hi, ki la pynpaw ruh ba ka jinglut ka long kaba khambun, namar ym tang ba ki hap ban siew bun ka bai pynpoi ia ki mar ki mata, hynrei kin hap ruh ban shim da ki truck na Assam bad hap ruh ban buh ia ki nongtrei na Assam hi ban pynthikna ba ki mar ki mata kin poi thikna sha Shillong, wat la ka ophis ka don ha Shillong bad kane ka long ka jingmyntoi ia ka Jylla Assam ym ia ka Meghalaya.

Ki la ong shuh shuh “Ki nongniah truck kiba ha ki por mynshwa ki ioh ban pynpoi ia ki mar ki mata baroh 30 sngi, mynta ki ioh tang 15 sngi ban pynpoi ia ki mar ki mata na Guwahati sha Shillong, kumta kin hap ban shim ha kata hi ka rukom ia ka dor kaba ktah pat ia ka iew ka hat ha ka jingkiewdor.
Ki la bynrap ba ka jingkhang ka jingkieng dam, ym tang ba ka wanrah jingeh ban pynpoi ia ki mar ki mata, hynrei wat ia ki nongleit nongwan ruh kiba ju wan lyngba ki Bus night super, namar ki hap ban hiar noh tang ha Damsite bad ki hap wan sha Shillong lyngba ki kali rit.