Ba khang ia ka nala, tuid ka um ha surok bah ha Umdap, Umjong

Shillong:Namar ka jingjot rathai ka surok, kaba la pyn syrtok shi katdei ha ka leit ka ka wan jong ki paidbah nongshongshnong kiba sha ka thain ong ka shnong Umdap Shakhoikuna,Umjong, Pahamsohbar bad kiwei kiwei de ki shnong kiba ju iaid lynti lyngba na ka surok PWD kaba sdang na ka shnong Pahamawlein 20mer kaba leit ter ter sha kitei ki shnong bad kumjuh kaba mih ruh shaduh sha Sonapur Assam.

Uwei na ki riewrangbah jong ka shnong Pahamawlein 20mer uba la tip kyrteng kum u Bah Prince Abraham Sylliang u la khang dam ia ka um nala kaba tuid lyngba ka jaka jong u, kaba la pynlong iaka nala ba kan tuid bad tuid sha surok PWD bad kane ka la pyn shitom shi katdei eh ia ki nongleit nongwan na katei ka surok, namar ka jing jylliew palat jong katei ka jing shlei um.

Haba ioh ban iakren bad utei rangbah ula iathuh kaba pynlong ia u ban leh kumtei ka dei na ka daw ka jing leh mynthi ka sorkar bad ka tnat PWD kaba wat hadien mynta la kumba daki phew phew snem na ka liang ki shnong, ki la ju ud bad kyrpad ia ka sorkar lyngba ka tnat PWD ban shna pynbha noh ia katei ka surok kaba sdang na Pahamawlein 20mer kaba leit ter ter shaduh sha ki bynta ka shnong umdap Shakhoikuna Umjong Pahamsohbar bad kiwei ki shnong.

Ha kane ka sngi hi, hadien ka jing ioh jing tip, katto katne por ki ophisar na ka tnat PWD byrnihat sub-division ki la wan poi sha katei ka jaka shlei um ban jurip hi da lade ia katei ka surok.
Ha ka jing iakren jong u Bah Prince Sylliang bad ki ophisar na ka tnat PWD, na ka liang u bah Prince u lah ong iaki ophisar ba lada ki ai ia ka jing kular ba kin shna pynbha noh ia katei ka surok ha kine ki khyndiat taiew un kloi ban pyllait noh ia katei ka jing khangdam ia katei ka nala um.

Na ka liang ki ophisar ki la kular ban shna pynbha noh ia katei ka surok ha kine ki khyndiat taiew ban wan.
Ha katei ka sngi la iadon lang ruh ki rangbah shnong ki paidbah nongshong shnong jong ki shnong jong ka Pahamawlein 20mer, Umdap, Shakhoikuna,Pahamsohbar bad kiwei kiwei ki shnong ba marjan kiba ju iaid lynti man la ka sngi na katei ka surok.