Ba jyllei ki khyrdop ki District Council, ia kynduh ki nongialam trok

Jowai: Myn hynnin ka sngi, ki ar tylli ki seng nongkhaii, lane ki seng jong ki trok kamai, kiba kynthup ia ka All Jaintia Cements & Clinker Transporters Association bad ka All Northeast Transports Association ka la pynlong ia ka jingialang ba kyrpang ha Sweet Chilly Hotel, Mynkre ha East Jaintia Hills District thain Lumshnong,
Ha katei ka jingialang la iatai sani bha halor ka jingshah ktah ki trai trok kiba shalan ia ki mar bapher bapher khamtam ia u Dewbillat bad Clinker na Lumshnong sha kiwei kiwei de ki bynta jong ka jylla shatei LAM-Mihngi.
Ia ka jingialang la pyniaid da u CEM barim ka JHADC u ma Hambertus Nongtdu uba dei ruh u President ka All North East Transporters Association ha ka jingiadonlang u President jong ka All Jaintia Cements and Clinker Transports Association u ma Balen Thubru.
Hadien ka jingiakren sani bha, halor ka jingduhnong ki nong shallan mar shabar ka jylla ka jingialang ka la shim ia ka rai ban dawa na ka sorkar jylla bad ban ai por ia u Chief Minister Conrad Sangma tang hapoh shi Taiew ban ai ia ka jubab lym kumta kitei ki nong shallan mar kin hap ban iaid da kawei pat ka lynti kaba khadduh.
La dawa ba ka sorkar Meghalaya lyngba u Chief Minister u dei ban pyntikna hangno ba dei ban don ki Weighbridge bad balei ba ki District Council ki ioh lad ban buh ia ki Check Point jong ki, da kaba khrong pisa jubor na ki driver trok. La dawa ruh ba ka sorkar ka dei ban buh ia ki jaka thew jaka woh (Weighbridge) tang ha ki bynta ban rung bad ba mih ki kali kit jingkit ym ban buh ha shilynter u surok bah tang ban ioh kamai spah ki Ministers lyngba ki Pulit kiba khrong bad kumjuh kito ki trai Weighbridge.
“Ngi la rai ban ai ia ka jingthoh sha ka sorkar halor kine ki rai jong ngi bad lada ka sorkar kam sngap ngin sa hap ban wad da ki lad ki lynti kiba khadduh bad ngin sa peit kai kan rem ka sorkar ne mangi, la ong u President jong ka All North East Transporters Association.
U President ka All Jaintia Cements and Clinker Transporters Association u ma Balen Thubru, u la ong ba ka sorkar ka dei ban pyntikna bad ban iathuh shai ia ngi hangno ki jaka thew haba ngi leit na Lumshnong sha Guawahati bad haba leit ruh na Lumshnong sha Silchar,
“Ki don haduh 3 tylli ki check gate ki District Council CIL, kawei ha Mookyndur, kawei ha Mawryngkneng bad kawei ha Umkiang, ki Weighbridge pat ki don ha UmTyr-a, ha Hynniawmer bad ha Umling – Byrni lada mih na Lumshnong sha Guawahati bad lada mih pat na Lumshnong kawei ka Weighbridge ka don ha Malidor, Rattacherra.