Ba jur ka dheng kali; thmu ka sorkar, ban pyntreikam biang, da ka odd even

Shillong:Ka jingdheng kali ha ka nongbah Shillong ha kine ki sngi ka la dei kawei na ka mat ka ba la pynsyrtok ia baroh ki nongleit nongwan, kum shi bynta ban weng ia kane ka jingeh ha ka nongbah Shillong na ka liang ka liang ka tnad Transport, kan sa pynsngew sha u Myntri rangbah ka jylla ban pynjari biang da ka Odd-Even rule.

Ha kaba iadei bad kane ka bynta, na ka liang u Myntri ka tnad transport u bah Dasakhiat Lamare, u la ong ba na ka liang ka tnad shen, kan sa leit rah ia kane ka mat sha u Myntri rangbah ka jylla u Conrad K Sangma, ban ia kren ban pynjari biang da ka odd-even rule ha nongbah Shillong ban weng shipor ia kane ka jingeh.
Na ka liang u bah Lamare, u la iathuh ba na ka liang ka sorkar ka la ju shim ia ki lad ki lynti ban weng ia kane ka jingdheng kali ha Shillong bad kawei na kine, ka long ba na ka liang ka sorkar ka don jingthmu ban rah noh ia ki ophis sorkar kiba heh sha ka jaka jong ka new Shillong.

” Ha nong bah Shillong hi ym don jaka shuh ban shna ia ki Over Bridges bad dei na kane ka daw ba na ka liang ka sorkar kam lah ban weng ia kine ki jingeh ha kaba ia dei bad ka jingdheng kali”u la bynrap.
U bah Dasakhiat u la ong ba ka jingshim rai ban rah noh ia ki ophis sorkar sha ka jaka jong ka New Shillong, kan iarap shibun ban pynduna ia kane ka jingdheng kali ha nongbah Shillong bad ha kiwei ruh ki bynta ba marjan.