Ba jot rathai ka surok Nongsder, ujor sha PWD

Shillong: Ka Seng Samla Shnong Nongsder ha ka 16 mynta u bnai ka la leit ban ia kynduh ia SDO PWD(Road) ka Pynursla Civil Subdivision, ban ia kren ia ka jingjot rathai ka surok na Mawpran ha Nongsder kaba hap ha Pynursla Civil Subdivision, East Khasi Hills District kaba donkam ban siang rong thymmai noh, namar ka jingjot ka rong ba la siang kham mynshuwa.

Ka seng ha katei ka jingiakynduh ka ai run da ka dorkhas ha u SDO PWD da u Samla Luckystar Nongrum u General Secretary. Na ka liang u SDO PWD u la iathuh ba na ka liang jong ka tnad ka la mut ban siang ia katei ka surok da ka buit thymmai ka NANO Technology.
Haba ai ia katei ka jingkular ia ka seng u SDO PWD, u la kyrpad ba ka seng ka ai jingiatreilang bad ban iaishah shipor, namar ban siang da katei ka buit kan kham bam por khyndiat bad ruh u kular ba na ka liang ka ophis un phah ia ki nongtrei ban tap khyndew ha ki jaka ba la jot palat. Shuh shuh u ong ba mar sien poi ka aiom ba kham duna slap ki enjiniar bad ka ophis kin jurip ia ka surok ban saindur ia ka jingmut siang rong thymmai. Na ka liang ka seng haba sngew ia katei ka jingkular ka kular ban ai ka jingiatreilang bad ka ophis jong u bad ruh ka seng ka shim ia ka rai ban bud dien ia katei ka kam.