Ki nongialam jong ka seng Congress na Delhi, kim shym la rai satia haduh mynta ia u myntri rangbah ha Rajasthan bad katei ka jing pynslem, ka la pynlong ia ki riew ieid ia U Ashok Gehlot bad kumjuh ia ki riew ieid jong U Sachin Pailot, ba kin mih madan ban pynbor ia ki nongialam jong ka High Command, ba kin jied myntri rangbah da ki nongialam jongki.
Ki nongkyrshan U Sachin Pilot, kiba thang shaka kali ha Ajmer.
Ki riew ieid jong U Gehlot bad kumjuh U Pilot, ki la mih madan ha khmat jong ka ophis jong ka seng Congress ha Jaipur, na ka daw ban ialum lymbung bad ka la don ruh ka jing ia thang ding ha khmat ka ophis jong katei ka seng. Ki nongkyrshan jong U Pilot, ki la maham ba lada U Pilot, uba dei u samla, um lah ban long myntri rangbah, kumta uwei pat u samla, uba ki thew beit ia U Rahul, un nym lah ruh ban long myntri rangbahduh ha u snem u ban wan.
Ki pulit ki iathuh ba ki don ki briew kiba pyrshang ban khang ia ki kali ha Dausa, Ajmer bad ha Karauli district. Ki riew pyrshah, ki la khang ia ki kali kiba iaid ha ka surok bah Jaipur-Agra ha Dausa bad ki ia thang ruh ia ki shaka kali. Ki don kum kitei ki jingjia ha ka surok bah Jaipur-Ajmer bad sa kiwei de ki jaka.
U Sachin Pilot, ula thoh ha ka twitter jongu, da kaba ong “Nga kyrpad ia ki riew ieid jongnga, ba kin long jai jai bad leh tip briew. Nga te nga shaniah beit ha ka rai jong ka High Command”. Ha Jaipur, ki nongkyrshan jong U Pilot bad U Gehlot, ki ia lum lymbung ha khmat iing jong kitei ki nongialam, haduh mynta ka sngi ruh.
Na bynta ka Madhya Pradesh, la sngewthuh ba ka High Command jong ka seng Congress, ka la jied ia U Kamal Nath, ba un long u myntri rangbah ba thymmai jong ka Jylla.