Ba jaboh tasam ka painkhana, leit sait hi u myntri sorkar ka Madhya Pradesh

U myntri jong ka sorkar Madhya Pradesh, uba peit ia ka tnat bor ding, U Pradhuman Singh Tomar, myn hynnin ka sngi, ula leit ban pynkhuid hi dalade ia ka painkhana, ha ka ophis jong U Commissioner, ha Gwalior.

Ha ka por, ba utei u myntri, u leit jngoh ia katei ka ophis, kawei ka nongtrei kynthei, ka la ujor ha u myntri, ba ka jaka leit shabar ia ki kynthei, ka jaboh palat bad mar kumta, ula pan ia u synsar bad kiwei pat ki tiar ban sar ia katei ka painkhana bad ula dei dalade hi ban sar bad pynkhuid, ha kaba la iarap lang da ki nongtrei kiba don ha katei ka jaka. U Tomar, u la ong ha ki nongthoh khubor, ba ki painkhana jaboh, ki buh jingeh ia baroh, khamtam lei ia ki kynthei.