Ba ioh vote ki bar jylla ha Khliehtyrshi, yn ujor ka JYF

Jowai, 16 Jylliew:
Ka JYF kynthup ia ka Women’s Wing kan sa leit ban ujor pyrshah ia ki bun ki bar jylla bad ruh ia u rangbah shnong ka Khliehtyrshi halor ka jingioh EPIC lane ioh thep vote MDC katkum ba la paw kyrteng ha ka JHADC E-Roll, 2014.
U Heimon Phawa bad ka kong Arilin Dkhar kiba dei ki nongialam ka JYF ha Khliehtyrshi, ki la wanrah mynta ka sngi ia ka E-Roll ka JHADC ban pynshisha ia ka jingioh rung kyrteng ki bar jylla kiba kynthup ia ki bar ri Nepali, ki Advasi bad ki Manipuri kumjuh ruh ki Mizo ha ka thup jied nongmihkhmat MDC. Katkum ka JHADC E-Roll 2014, u Miller Biarkrem Puia Renthlei, u William Ralte, u Choaba Gondaimei, u Narayan Lama, u C. Lalthanzika, u Dhormo Kamei, u Samuel Topno, u Z0ramchhana Sailo, u Arun Kullu, u Somipei P Shimray, u Victor P Shimray, u Biazidinga Renthlei, u Wanghring Hulang, Lalsangpuii Renthlei, u Raju Gurung, Phulmaia Sunar, Raitka Sunar, Maya Sunar, Jamuna Sunar kiba dei ki bar ri Nepali, Thiamei Gonmei, Martha Tudu, Laibiak Diki, T Lalnil Lawma, Athoi Hulang nalor kiwei kiwei. Na ka liang ka JYF- ka la pynrem jur ia u Rangbah shnong ka shnong Khliehtyrshi, u ma Kitbok Rymbai bad ruh ia ki bor ba dei peit ia ka Election halor ka jingiohlad kitei ki bar jylla ban ioh pynrung kyrteng ia lade hapoh ka E-Roll ka JHADC na ka bynta ban iajied nongmihkhat MDC.
Na ka liang ka seng kan sa ujor sha u Deputy Commissioner Election WJH bad ruh sha u Chief Executive Member ka JHADC halor kane ka kam be-ain u Rangbah Shnong bad kitei ki Bar jylla. “Ngi tip tikna ba u Rangbah Shnong udei uba ai Residential Certificate ia kitei ki briew tang na ka bynta ban pynjop ia u hynmen jong u uba dei ruh u MDC ka thain, u ma MB Rymbai- uba ju bat ruh ia ka shuki CEM ka JHADC”, la pynpaw ki nongialam ka JYF.