Ba ioh kyrtong ba biang bad ka jingkyrshan ki paidbah, skhem ka HSPDP ban jop na Umsning

Nongpoh: Ha ka sngi kaba ka Hills State People’s Democratic Party (HSPDP) ka la pynlong ia ka jingialang ha Umsning Auditorium Hall bad kaba dei ruh ka sngi kaba katei ka Party, ka la pynbna ia u Bah Primson Makdoh, u samla na ka shnong Umdihar, ba un long kum u Kyrtong ka Party bad u ban sa aireng na Umsning Constituency, ki la pynpaw ba ki don ia ka jingkyrmen kaba skhem ba ka Party kan jop na katei ka Konstitwensi ha kane ka Ilekshon 2023.

Katei ka jingkyrmen jong ka Party HSPDP, ka la jia hadien ba ki la iohi bad sakhi ba ki la don shibun ngut ki paidbah, kiba la wan ban sakhi ia katei ka jingialang bad kitei ki paidbah, ki la pynpaw ia kata ka sur ba kin ai ia ka jingkyrshan kaba tyngeh ia ka Party HSPDP ha kane ka kynti kaba mynta bad khamtam eh, ba ki la ioh ia u briew uba shong ba sah hapoh ka Konstitwensi.

Ha ka jingkren uwei hadien uwei, kitei ki heh ka HSPDP, ki la pynpaw ba ha kane ka kynti kaba mynta ka Party HSPDP kan sa khie khlieh ha Ri Bhoi bad na ki sakhi kaba ki la don ka jingkyrmen kaba skhem ia mynta, ki kynthup ia ka Mawhati Constituency bad Umsning Constituency, namar ba ki la ioh ia ki briew kiba biang eh, na ka bynta ba kin long kum kita ki kyrtong ba kin aireng ha kane ka Ilekshon 2023.

Kitei ki heh ka HSPDP, ki la pynpaw ba ha ka sngi kaba ka Party ka pynbna Tiket ha Mawhati bad kiba la ai ia ka Kong Iba Kharbani, ki la don ha ki hajar ngut ki paidbah kiba la wan ban ai jingkyrshan bad mynta ka sngi ha Umsning, ka jingwan ki briew ka la long kumjuh, ha kaba katei hi ka pynpaw ba ka Party ka don jingkyrmen bha na kitei ki 2 Konstitwensi kaba ki la pynbna kyrtong.

Na ki heh ka HSPDP, kiba la donlang ha katei ka sngi ki kynthup ia u Bah K.P Pangniang, President ba rangbah ka HSPDP, nangta ka Kong Badariti L. Nonglait, President ka HSPDP Women’s Wing, u Bah P.B Sylliang, President HSPDP ha Ri Bhoi lem bad shibun kiwei de ki heh ka HSPDP.