Ba ioh bai shun tang T.30klur na ka Jylla Kyntait ka NEEPCO, ban sdang ai bor ding

Shillong 30, Iaiong:
Ka North Eastern Electricity Power Corporation (NEEPCO) ka la thet kti ban weng ia ka jingsangeh sam bording sha ka jylla Meghalaya namar ba kam lah ban siew ia ka ram bad ka la niat sha kti ka tnad bording ka ri ban weng ne em ia ka jingsangeh sam bor ding sha ka Meghalaya.
U Chairman bad managing director ka NEEPCO u PC Pankaj u la ong ba ka Corporation ka kwah ba ka sorkar Meghalaya ka dei ban siew noh ia ka ram kaba sah haduh T.379 klur, ym tang T.30 klur.
U Pankaj u la ong ia u Myntri Rangbah ka jylla u Mukul Sangma ba un siew kham bun sha ka NEEPCO khnang ba yn lah ban ai biang ia ka bording.
“Nga la ong ia u Myntri Rangbah ban siew bun sha ka NEEPCO haba u phun ia nga ban weng noh ia ka jingsangeh sam bording sha ka MeCEL”, la ong u Pankaj. U la ong ba ha ka jingiakren, u Myntri Rangbah um shym la ong katno ban siew hynrei hadien la ioh ia ka jingtyrwa ban siew tang 10 percent na ram kaba don mynta. U Pankaj u la ong ba u sngew synei ia ki paidbah ka Meghalaya namar ka jingthut ka jingsam bording naduh ba la sangeh sam bording ka NEEPCO ha kine ki shi snem. U la ong ba u la ai jingmut ia ka Meghalaya ba kan iakren bad ka tnad bording ka sorkar India ban iapynbeit ia kane ka ram kaba iadei bad ka NEEPCO.
Katkum ka jingong u Pankaj ka tnad bording ka India ka la buh ban iakynduh ha ka 2 tarik Jymmang ban don lang na sorkar Meghalaya, ka NEEPCO ban iakren ia kane ka kam ha Delhi. Kaei kaei ka rai kaban shim ha kane ka jingialang yn pyntreikam.