Ba ieng ki paki dulan bad tei surok ka Assam, khot hajir ka KHADC ia ki Syiem

Shillong: U Chief Excutive Member jong ka Khasi Hills Autonomous District Council u bah Titostarwell Chyne, mynta ka sngi, u la iathuh ba na ka liang ka Executive Committee, ka la shim ia ka rai ban khot hajir ia u Syiem jong ka Hima Mylliem bad ia u Syiem ka Raid Marwet halor ka jingioh ban shna ia ka iing 3 mala jong ka Transit Camp jong ki pulit Assam ha Khanapara bad ban khot hajir ruh ia u Acting Syiem ka Hima Nongspung halor ka jingiaid shait shait ka jingpyntrei jong ka Sorkar Assam ban tei ia ka jingkieng ha Balakhawa.

Haba ia kren bad ki lad pathai khubor na ka liang u bah Titostarwell u la iathuh ba na ka liang ka EC ka la dep ban bthah ia u Excutive Member incharge jong ka Elaka u bah Jambor War ban khot hajir ia u Syiem ka Hima Mylliem bad u Syien ka Raid Marwet bad kumjuh ia u Acting Syiem ka Hima Nongspung halor ka jingioh jong ka Sorkar Assam ban tei ia kawei ka iing ha Khanapara bad ia ka jingkieng ha Balakhawa.

U bah Titostarwell Chyne u la iathuh ba hadien ba la ioh jingtip ia ka jingwan tam pud bad sdang ban shna ia ka building jong ka Transit Camp jong ki pulit Assam, ha Khanapara ka ba hap ha ka Hima jong ka Hima Mylliem bad kaba hapoh ka jingpeit jong u Syiem ka Raid Hima Marwet, na ka liang jong ka EC ka la rai ban shim khia ia kane ka bynta bad ki la khot hajir ia u Syiem jong ka Hima Mylliem bad u Syiem jong ka Raid Marwet ba kin wan pynshai halor kano ka nongrim ba ka Sorkar Assam ka ioh ban shna ia ka ne ka building hapoh u pud u sam jong ka Jylla Meghalaya . U la iathuh ruh ba ha kaba ia dei bad ka jingiaid shait shait ban shna ia ka jingkieng ha Balakhawa, ia kaba la dep pynsangeh ha ki por ba la dep hynrei mynta ki la sdang biang bad mynta kane ka jingkieng ka la jan dep kumta ka la bthah ia u acting Syiem jong ka Hima Nongspung ba yn wan pynshai halor kane ka bynta.

U bah Tistoswell u la iathuh ba na ka liang u acting Syiem ka Hima Nongspung u la dep ban leit jurip ia kane ka jingkieng hynrei haduh mynta ym shym la tip ba u ne u acting Syiem u la leh ban pynsangeh ia ka jingtei ia kane ka jingkieng bad kumta na ka liang ka EC ki la khot ban hajir ia u ban wan pynshai halor kane ka bynta .