Ba iap ha along, thung kynhun tohkit ka sorkar

Shillong,20 Jymmang:
Ka sorkar jylla ka la thung da ka kynhun tohkit , bad katei ka jingtohkit yn pynlong da u Commissioner jong ka  Garo hills division u bah PW Ingty ban tohkit halor ka jingiap jong u Balsan S Marak hapoh along ba u dang don ha ka jingshah tohkit. La ai por ban pyndep ia katei ka jingtohkit hapoh ka 30 sngi.
Ka jingtohkit kan kynthup lut naduh ki lad jingsumar bad kiwei pat ki jingjia katkum ki jingshisha bad yn tohkit ruh io lehse ka don kano kano ka jingleh palat na ka liang ki pulit kaba la ialam sha ka jingiap jong u Balsan S. Marak , ha ka por ba u dang don hapoh ka jingtohkit ka kashari, kumba la mih ki jingkynnoh. Halor katei ka jingjia u Marak, ka sorkar jylla ka la kyrpad sha ki paidbah ka Garo Hills ba kin bat ia ka ain, ym ban pynmih kano kano ka jingkulmar kaba lah ban pynthut ia ka shongsuk shongsain.