Ba iaknieh jaka ki bar jylla bad ki Khasi ha Iewduh Ioh jingujor ka KHADC

Shillong, 18 Nailar:
Ka KHADC ka la ioh jingujor kumba saw ne san tylli halor ki kam iaknieh jaka die madan jong ki Khasi bad u dkhar ha Iewmawlong. Haba iakren mynta ka sngi Nyngkong bad u ophisar ka KHADC ba la thung ban peit bad pdiang ia ka jingujor (help desk) na ka bynta kino kino ki kam ba iadei ha Iewduh, la iathuh ba ka jingujor ka don kumba saw ne san tylli na ki nongshong iew ha Iewduh. Kane ka long hadien san sngi ba la dep ia ka jingialang ha Mot phran.
Kine ki jingujor ki long ba iadei bad ka jingiaknieh jaka die ma dan jong ki dkhar bad ki Khasi. “La ioh jingujor ha kaba don ki sngi ba jah u dkhar, la shong Khasi bad haba wan u dkhar, la duh shong die madan ki Khasi”, la ong u ophisar ka KHADC ba la thung da ka Executive Committee (EC) ban shim ia ka jingujor kiba dei ha Iewduh.
U la ong ruh ba don ki Khasi ba wan ujor ba shah khang die jingdie ha u dkhar. “Ka jingujor ka long ba u dkhar um shah ban shong dukan hakhmat ne phylla ka dukan jongu”, la ong u ophisar ka India.
U la ong ba na ka liang ka Council kan pynlong ia ka jingbishar ban peit ia ki jingujor.
Lah ban kdew ba u Chief Executive Member (CEM) ka Khasi Hills Autonomous District Council (KHADC) u Bah Ardent M Basaiawmoit ha ka jingialang ha Motphran ha ka 12 tarik mynta u bnai u la pynbna paidbah ba ka Council ka la thung ia u ophisar ka Council ban long kum u nongshim ia ki jingujor ban wan da ki briew na Iewduh halor kino kino ki jingeh khamtam ban pynpeitngor ia ka jinglong jingman ka Iewduh.
U CEM u la ong ba la buh khnang ia kane ka jaka iarap paidbah ne help desk ka long ban pynsuk ia ki paidbah ban wan ujor lada don ne ki ioh jingtip ne iohi ia kino kino ki kam kiba long pyrshah ia ki rai ba la shim ban pynlong ia ka Iewduh kaba khuid bad kaba lait na ki kam bym man.
Lah ban kdew ba u Bah Ardent ha katei ka jingialang u la pynbna ia ki rai ki kynthup bay m shah shuh ban die kyiad ha Iewduh kynthup ki Restaurant, ym shah shuh ban sahmiet ha Iew, lait noh ki bor pahara, Ki Daju kin hap phong uniform, bad ki bym dei ki trai jylla kin hap shim labour licence, Yn nym shah shim khajna shuh ia ki mar rep ne kiwei pat ki mar kiba hapoh 35 Kilo, kiba 35 haduh 50 kilo kin hap ban siew khajna T.10 bad kiba palat ia ka 50 kilo kin hap siew T.15,
Ka jingkhate ne ot ia ki byrni ne kriah kan long 2 kilo na man ka 50 kilo bad 3 kilo na ka 100 kilo, yn shna shuh ia ki Painkhana ha ki jaka ba lait ban thoh sha ka Municipal ban pynbha ia ki nar kor um kiba la lyngkrang hapoh Iew.