Ba iakhih ki nongtrei SSA duh tulop mangi ki nonghikai MSSASA:Aristotle

Shillong 19 Nailar: Ki nonghikai SSA hapoh ka shatri jong ka Meghalaya SSA School Association (MSSASA) central body ka ba dei kawei na ki nonghikai hapoh la jylla ha ka 19 tarik nailar 2024, ka la wan ban pynshai ha ka ba iadei bad ka jingshah set bad shah bat ka tulop jong u bnai Naitung (july).

Ha ba kren sha ki lad pathai khubor u president ka association u bah Aristotle C. Rymbai u la pyntip, ba Myn ha ka 6 tarik nailar (august) ki la leit ban ia kynduh ia u state project director bad ban buh da ka jingthoh ban dawa ia ka tulop jong ki nonghikai jong u bnai Naitung (july) hynrei ngi la ioh jingtip ba ka jingslem ban pyllait ia kane ka tulop kadei na kadaw ba iakhih ki nongtrei SSA.

U la ong ruh, ba Ka sorkar jylla ka la dep mang ban siew ia ka tulop jong ki Nonghikai SSA hynrei ka tulop ka la pynslem na ka daw ba pynlong jingiakhih ki nongtrei SSA.

U president u la ong, ba ngim kwah ban kynthoh ia ki nongtrei SSA ban pynlong jingiakhih hynrei ka jingiakhih jongki ka la pynduh ia ka tulop jong ngi jong  u bnai Naitung (July).

“Ngi dawa ba ka sorkar kadei ban wad ki lad ki lynti ban pyllait noh ia ka tulop jong ngi jong une u bnai ba la sahteng,” la bynrap u bah Aristotle.

Ha ka 14 tarik u State Project Director u la ong, ba un sa shim da kiwei pat ki lynti ban pylait noh ia ka tulop ba dangsah jong ki nonghikai SSA bad na ka liang ka ophis hapoh kine ki taiew kin sa ioh ban pyllait noh ia ka tulop watla ka jingiakhih ki nongtrei SSA ka dangiaid shakhmat.

“Nakaliang ka Association ha ki to ki bnai bad ki snem ba sah ka tulop jongki, ngi khlem shong klikti hynrei na kapor sha kapor ngi iai dawa na ka sorkar ha ka ba iadei bad ka tulop bad hadien kane ka jingiakhih ngi iohi ba ka sorkar ka la shimkhia ban siew hok ia ka tulop jong ka association, “ong u bah Aristotle.

Ka Association jong ngi kadei ba la register bad ka sorkar jylla bad kadon ia ka jingbthah (guideline), ka riti synshar (Constitution) ban leh ia kano kano ka bynta.

Shuh shuh u la bynrap ba lada jia ba ka sorkar jylla kam pat siew ia tulop jongki ka association kan sa shim da kiwei pat ki sienjam.

Ha ba iadei pat bad ka jingshongiakhih ki nongtrei SSA, na ka liang ki nonghikai ka MSSASA ki la pynpaw, ba kim ai ka jingkyrshan ha kaba iadei bad ka jingiakhih jongki.