Ba ia shoh ha phatok, mynsaw U Champion bad 4ngut ki koidi

Shillong, 26 Jylliew:
San ngut ki koidi (Under Trails Prisoners (UTPs) jong ka Shillong District Jail ki la mynsaw hadien ba la mih ka jingiashoh iadat para koidi, mynta ka sngi dang step bad nadeng kine kiba mynsaw, ki kynthup ia U chairman ka GNLA u Champion Sangma.
U Chairman ka GNLA bad saw ngut kiwei ki koidi ki la mynsaw ha ka jingiashoh iadat bad la pynkit wut wut sha Shillong Civil Hospital ban shah sumar. Lai ngut kiwei ki koidi ki mynsaw malu mala bad shu tah dawai.
Katkum ka jingong u Director General (Prison) u Kulbir Krishan, u Champion R Sangma u la shah suh na khlieh namar ba la mynsaw bad la buh ha hospital. Kiwei pat ki koidi kynthup u Milstone G Momin, Polab D Sangma, Sankyntiew Decruse bad u Suresh M Sangma la pynlait noh hadien ba la ai dawai.
Haba kylli kaei ka daw jong ka jingjia, u Krishan u la ong ba ka dawa ka dei ka jingjia hynrei ym pat tip ia ka daw ba thikna namar ba la thung da ka jingtohkit na ka tnad halor kane ka jingjia ba la khlieh da u AIG MK Sangma bad ia ka jingtohkit yn sa aiti ha ka sngi Thohdieng.
U Krishan u la iathuh ba kum kane ka jingjia ka la jia ruh ha ki snem ba la dep bad na ka liang ka tnad ka la shim bha ia kane khamtam ba ka phatok ka la khapngiah da ki koidi kaba ju wanrah ia ka jinghuri hura hapdeng ki para koidi.
Ka jingngiam jong ka phatok ka long 150 (135 ngut shynrang bad 15 ngut kynthei) hynrei ka jingdon jong ki koidi haduh mynta ka long 400 (386 shynrang bad 14 kynthei).
“Kane ka la wanrah ia ka jingeh ia ki nongtrei ka phatok namar ba la mang ia ki nongap tang na ka bynta 150 ngut ki koidi bad ka long kaba eh ban iapynbiang ia ki 400 ngut ki koidi” la ong u Krishan.
“Kum kane kajuh ka jinglong jong ki phatok ha Jowai bad ha Tura hynrei hadien ba la iakren la mang 12 tylli ki kam na ka bynta ka Shillong District Jail bad nga kyrmen ba kane kan iarap katto katne ia ka jingduna ha phatok” la ong u DG Prison.
Hadien ba la pyndep ia ka phatok ha Nongpoh bad ha Nongstoin, u Krishan u la ong ba ki koidi na Shillong Jail un kynriah noh sha kitei ki phatok kaban ngiam 100 ngut kawei kawei. U la pynpaw ia ka jingsngew bynniaw hadien ba ka projek kam shym la urlong wat hadien 6 snem naduh ba la sdang ia ka khlem pat lah ban pyndep.
Ka Senior Superintendent ka Civil hospital ka Dr LL Sawian ka la ong ba u Champion u biang bad ym don kano kano ka jingma na ka jingmynsaw.
Ha kajuh ka por ki pulit ka nongbah ki la pynbiang ia ka jingpahara ha sawdong ka hospital ban iada na kano kano ka jingjia.