Tang katto katne por hadien ba la her stet, ka khubor hamsaia ba kiew dor ka mluh kaba la pyn lamwir ia ki nongiew, ka Majistor kaba la phah da ka bor District ka la poi sha Iewduh ban wad ia ki dukan kiba die tam ia ka dor bad ban kem ia ki nong die. Ka kong C Doreen Lyngwa, ADC ka la poi sha iewduh ban wad ia ki jingshisha dalade hi halor ka iew mluh, ha ka por 1.30nohsngi. Katei ka Majistor ka la hiar ruh sha kawei ka dukan kaba don ha Stand Jeep kaba dei ka dukan jong ka M/S NRL Enter prise, Jeep stand-Rice Dealer bad ka jingtohkit ia katei ka dukan ka la iaid kumba katto katne por. Ha mar ba dang ia tuklar ia ka dor die mluh katei ka dukan, ar ngut ki rangbah ki la ujor ba katei ka dukan ka la die tam, hynrei la pynbeit noh ia katei ka jingbakla, ka juh ka mar ar ngut ki briew ki la thied ar dor uwei T.800 tyngka shi byrni bad uwei pat T.850 shi byrni bad hadien ka jingiakren kitei ki ar ngut ki rangbah ki la pynphai noh ia ka mluh bad ka nongdie ha katei ka dukan ka la pynphai noh ia ka pisa jong ki, kaba long T.1650 tyngka (ar byrni).
Hadien ba la dep nangtei ka Majistor ka la iaid ia baroh kawei ka iew, hynrei ka la lap ba baroh ki dukan kim don mluh shuh bad ki la kam ba ki la die ha ka dor kumba ju die, lait noh ka NRL Enterprise kaba don katto katne ka stock.
Ka kong C Doreen Lyngwa,ADC ka la kyntu ia ki paidbah ba kim dei ban ngeit ia kum kitei ki khubor hamsaia, khlem da ioh ki jingpynbna ba iar napoh ka bor district, bad ki dei ban ujor lada don kino kino ki dukan ba die tam ia ka dor ba la thoh ha ka song jong ka mar. Kane ka juh ka jingkyntu ka la mih ruh na u trai dukan ka Rajasthan Food Grain Store uba la kyntu ia ki paidbah ba kim dei ban tieng ioh duh mluh hynrei ki dei ban ap tang lashai la shisngi ka mluh kan sa poi ha ka dukan jong u bad un die kumba ju die ha ka dor iew.
Phi don ban ong eiei?