Ba hiar ka jingpynmih mar rep, weng ka sorkar, ia ka jingkhang dawai sboh

Shillong:Namar ka jinghiar palat ka jing pynmih ia ki mar rep ha ka jylla, na ka liang ka sorkar jylla mynta ka sngi ka la shim ia ka rai ban weng noh ia ka jingkhang ban pyndonkam da ka dawai sboh, ha ka rep ka riang ha ka jylla.

Haba iakren bad ki lad pathai khubor na ka liang u Symbud myntri rang bah ka jylla u bah Prestone Tynsong, u la iathuh ba mynta ka sngi ka la don ka jing iakynduh bad ki seng nongrep na East Khasi Hills district bad ha kane ka jingia kynduh, ki la pynsngew halor ka jingmad jingeh jong ki ha ka rep ka riang namar ka jingkhang ka sorkar ia ka dawai sboh.

“Naduh u snem 2014 ka sorkar ka la ai ka lad lyngba ka ministry of Fertilizer ban ai ki urea bad ki sboh dawai na ka bynta ban thung ia ki jhur ki jhep jong ki, hynrei hadien na ka liang ka sorkar kaba la ialam da u Dr Mukul Sangma, ka la phah sangeh ia kane ha ka kyrteng jong ka Organic mission, ka rep ka riang ha ka jylla ka la hiar palat”u la bynrap.

U bah Tynsong u la ong “Ka Organic Mission kam dei ka mission ka ba bakla, namar ba kane ka pynshlur ia ki nongrep ban pyndonkam da ka sboh organic khnang ban shait ban khlain bad ha ka jingshisha kane ka sienjam jong ka sorkar barim ka long kaba biang, hynrei ka jingeh hangne ka long ba naduh bym ioh ban pyndonkam ia kine ki dawai sboh ka jingpynmih ia ki mar rep ka hiar haduh 45 %”.

U bah Tynsong, u la iathuh ba mynta ka sngi, ki seng ki nongrep ki la buh ruh ka jingkyrpad na ka sorkar ba lada ka ai kane ka jingbit ban pyndonkam da ka dawai sboh, ka sorkar ka iarap ban pynbiang ia kine ki dawai sboh ha ka dor ba tad kum ba ju leh ha ki por mynshuwa.
“Na ka liang ka sorkar ka la shim ia ka rai ban shah biang ia ki dawai sboh bad kane ka long ban pynkiew ia ka jingpynmih ki mar rep ha ka jylla”u la ong.
U la bynrap shuh shuh “Ka sorkar jylla ha ka 9tarik u Nailar mynta u snem, ka la pynmih ia ka jingbthah ba ka la weng ia ka jingkhang ban pyndonkam ia ki dawai sboh ha ka rep ka riang bad kin leit sha Delhi ban iakren na ka ban pynpoi biang ia kine ki dawai sboh sha ki nongrep ka jylla”.

Halor ka dor jong ka dawai sboh, ka sorkar kan iarap ruh ia ki nongrep ban pynsiew shiteng dor na ka dor ka ba la buh da ka Ministry of Fertilizer.
“Ki nongrep kin hap ban siew shiteng dor na ka bynta ka dawai sboh ha kaba ka sorkar kan sa siew shiteng na ka dor kaba la buh na ka ministry”u la ong.
Na ka liang u Symbud myntri rangbah ka jylla, u la buh ruh ka jingkyntu ia ki nongrep ba wat la ka sorkar kan weng noh ia ka jingkhang ban pyndonkam ia ki dawai sboh, ha ki marrep jong ki, hynrei ki dei ban wad lad ruh ban pyndonkam da ka sboh organic kiba lah bn pynmih, na ka jylla.