Ba her stet u nongniah, beh thong ki CRP, mynsaw uwei ba bthei ka suloi AK

Shillong: Ha ka miet jong ka 2tarik Iaiong 2025, ha ka por 11.30 mynmiet, katba ki pulit jong ka Mendipathar lem bad ki CRP, ki dang pahara ha khmat jong ka dukan die jain ha Pushpa Cloth Store, hajan ka iew Mendipathar, ka la wan her stet bha kawei ka kali rong lieh, kaba don ia u number B/R. No. AS 01 AM 7750 bad ka da thew ban tynrah ia uwei u pulit CRP, uba shong ha ka shuki, ha khmat jong katei ka dukan.

Ki CRP, kiba don ha katei ka jaka, haba ki iohi ia katei ka kali kaba tur beit beit sha ka jaka ba ki don, ki la kynthih noh ha ki jaka ba ki shong pahara, hynrei u nongniah u nang pynher stet hi ia ka kali jongu, da ka jingthmu ban phet bak na katei ka jaka ba la pahara da ki pulit bad ki CRP.

Ha katei ka jingjia, haba ki pulit, ki iohi, ia ka jingma na katei ka kali bad ba ki lah ban shah siat, kumta ki la beh thong ia katei ka kali, hynrei katei ka kali, ka tur beit beit shakhmat ban phet na katei ka jaka ba ki don ki pulit bad mar kumta u CRP, ula tied da ka suloi jongu, ka AK Rifle ban plie ia katei ka jingkhang, hynrei katei ka kali ruh ka dang iaid hi shakhmat ban phet na ka jaka jong ka jingjia bad ha ka jingiaid jong ka kali, katei ka suloi ka la bthei bad u kuli, u leit dei ia uba shong hangtei hapoh, u Neobirth R. Marak (28), uba na ka shnong Thapa Darenchi jong ka Resubelpara, North Garo Hills. U Neobirth R. Marak, u dei uba shong hajan u nongniah bad kumta na ka jingbthei u kuli, ula mynsaw na ki lbong jongu.

Ki pulit ki la ialam mar mar ia u nongniah jong katei ka kali, uba kyrteng U Sengrim K. Sangma, uba na Thapa Darenchi jong ka Resubelpara, North Garo Hills district sha Mendipathar PHC, ba kin ioh jingsumar.
Na ka jinglap jong ki doktor, U Neobirth R. Marak, ula mynsaw na baroh ar tylli ki lbong jongu bad la iathuh ruh, ba ula buaid jawsheh bad kumta um lah shuh ban kiar ialade bad la rah ia u sha ka hospital kaba kham bha, na ka bynta ka jingsumar, katba U Sengrim K. Sangma, um shym la mynsaw eiei, tangba ula buaid eh, namar ba u die kyiad haduh 1.9 g/L BAC (High). La lap ruh shibun bah ki bitor kyiad, na katei ka kali, ong ka khubor.