Nongstoiñ: Ki dkhot bad nong kitkam jong ka Mahila Nongstoiñ Block Congress Committee, myn hynnin ka sngi, ki la leit ban tur sha ka ophis jong u Deputy Commissioner ka West Khasi Hills District bad ban leit iakynduh markhmat ruh ia u khlieh duh jong ka District u Arun Kumar Kembhavi ban pan jingshai halor ka jingshah pynduh noh ia ka pisa kaba long T.5 hajar kaba la ai da ka sorkar barim shuwa ka election kyrpang na ka bynta ki longkmie.
Ki dkhot bad nongkitkam ka Mahila Congress katba ki dang ia boi ha kamra u DC ban pan jingshai ia ka T. 5000 hajar ba shah pynduh:Rupang
Ia katei ka jingleit ia kynduh DC la ialam da Ka kong Ditina Marwein President jong ka Mahila Nongstoiñ Block Congress Committee ha ryngkat ka jingiasynrang lang ruh ia kitei ki longkmie da u bah Gabriel Wahlang u ba dei u kyrtong na ka seng Congress uba la shah rem noh ha kane ka ilekshon kaba dang shu dep, u bah N Nongdkhar MDC barim ka thain bad ki katto katne ngut ki riew rangbah jong ka seng Congress.
Na ka liang jong ka kong Ditina Marwein, haba iakren sha ki nongthoh khubor ka la ong ba kaba la pynlong ia ki ba kin leit ia kynduh ia u DC, ka dei namar ka jingshah pynduh noh ia katei ka pisa, ia kaba la mang ruh haduh T.5 hajar, na ka bynta ki longkmie kaba dei ruh ka scheme kaba la ai da ka sorkar kaba rim.
“Ngi sngew lyngngoh bad ngi sngew kyndit ba ka Nongstoin Block, ka la shah pynduh noh ban ioh ia katei ka bhah jong ki longkmie katba kiwei ki Block kiba kynthup ia ka Mawshynrut bad ka Mawthadraishan ki la dep ai bad don ruh ki briew kiba la ioh pdiang ha ki Account jong ki, pynban ngi shane sha Nongstoiñ ngim shym la ioh, namar kata ka pynlong ia ngi ba ngin wan ban ia kynduh bad u DC ban wad ia ka jingshisha bad ruh ban pan jingshai ba kaei kaba la pynlong ia ngi ba ngin duhnoh ia la ka bhah bad na ka liang jong ngi ngin iai dawa beit ba ka hok jong ngi baroh ngi dei ban ioh” ong ka kong Marwein.
Ha kaba iadei bad katei ka bynta na ka liang jong u DC ka WKHD, u Arun Kumar Kembhavi haba iakren sha ki nongthoh khubor u la ong “Na ka liang jong nga ngam lah ban dang ai bor ia ki BDO ba kin pyllait ia kane ka pisa namar kam dei kaba nga shu leh donbor ma nga, hynrei kadei kaba la bthah ia nga da ki bor ki ba halor ba ka dei ia nga ba ngan pynsangeh shuwa shipor; katba ngam pat ioh pat da kawei pat ka jingbthah na ka sorkar” bad u la ong ruh ba haduh mynta ha kaba iadei bad katei ka bynta um shym pat la ioh pdiang ia kano kano ka jingthoh, hynrei u la ioh jingtip ba ka jingpynkhreh na ka bynta katei ka kam ka dang iaid.