Ba dei ka aiom lehkmen, sangeh shwa ka maramot Umiam, ong ki Rangbah Shnong

Nongpoh:U Bah B.B Makdoh, Chairman ka Synjuk ki Rangbah Shnong ka Ri-Bhoi District, u la kyntu ia ka sorkar jylla ba ka dei ban pynkren lem sha ki bor ka ITC Cementation India Limited, ba ka dei ban kren lem, na ka bynta ban phah pynsangeh ia ka jingmaramot ia ka jingkieng heh Umiam, namar ba ka dang dei ka Aiom lehkmen ki briew bad bun ki briew kiba donkam ban hiar kiew sha Shillong, da kaba pyndonkam lyngba katei ka jingkieng.

Haba pyntip sha ki lad pathai khubor, u Bah B.B Makdoh, u la ong ba ka nongrim kaba la pynlong ia ka Synjuk ba kan kyntu sha ka sorkar jylla, ka dei hadien ba ki la iohi bad lap ia ka jingsyrtok ki paidbah kiba thmu ban kiew sha Shillong, namar ba kim ioh shuh ban iaid lyngba katei ka jingkieng bad kiba la hap ban pyndonkam lyngba kiwei pat ki surok kiba la kham kyllain bad jngai, ha kaba ka la ktah eh ha ka leit ka wan ki paidbah.

Ha kawei ka liang, ngi sngewkmen eh ba ka sorkar ka la shimkhia ban phah maramot noh ia katei ka surok, hynrei ha kaba kum kane ka por ba ki briew ki bunkam ban leit thied jingthied sha Nongbah Shillong, ka la ktah eh ia ka por ki paidbah bad kumta lada long kaba lah ka sorkar ka la dei ban btah sha katei ka Kompani, ba ka dei ban sangeh shwa shipor bad sa bteng pat ia ka jingpyntrei, hadien ba la kut ka Aiom rakhe Khrismas bad pdiang snem thymmai da ki paidbah.