Shillong:Wat la ka sorkar jylla, lyngba ka ophis jong ka Deputy commissioner ka East Khasi Hills District ka la dep pynbna dangshen ba ki kali kamai ki la lah ban ïaid bad kit nongshong kali (passenger) kumba 100%, hynrei katei ka hukum kam shym la treikam satia sha ki katto katne kiba ñiah kali kamai ha Shillong.
Ïa katei la ïathuh ruh bad kubur da katto katne ki nongñiah kali kamai haba kren bad u nongthoh khubor hadien ba la ïohi ïa ka jingbym pat pynhiar dor satia ïa ka bai kali bad ka jingbym pat treh kit bun briew ne 100% ki passenger ban shong hapoh ki kali kamai.
“Wat la ka sorkar ka la ailad ïa ngi ban kit 100% hynrei ngim pat kwah ban leh ïa katei namar ka petrol ruh ka dangrem bad ngi shem jingeh ruh wat ban pynmih bai malik,” ong katto katne kiba ñiah kali kamai sha ki thaiñ Laitumkhrah haba kren bad u nongthoh khubor.
Ki la ïathuh ba ka dor petrol ka la poi kumba T. 93.89 naïa ha ka shi litar, kaba mut ba ka dangrem, ki la ong ba kam pat myntoi eh ban phah shong kali kumba mynshwa, lada ym pat duna ka bai petrol ka ïawan ïalong kumjuh bad mynta lei lei ba bun ki paidbah ki dang salia ban ïamih bun briew kumta ka eh ruh ban ïohi ïa ka jingpahuh ki nongleit nongwan ban kwah shong kali kamai.
Wat la ha ki por mynshwa, bym pat rem palat ka petrol, ban leit shaduh Police Point, Laitumkhrah ka dor bai shong kali taxi ka danglong T. 10 haduh T. 20 marwei, hynrei mynta pat lah bun bnai ka la kiew bad neh sah ha ka dor T. 30 wat haduh Don Bosco Square, Laitumkhrah, Shillong namar ki ong ba kat bym pat hiar dor ka umphniang ka dangeh ïa ki ban pynhiar dor ka bai shong kali kamai.
Like👍👍👍👍👍🙏