Shillong:Ki samla pule ka skulbah North Eastern Hills University (NEHU) hapoh ka kynhun NEHU Students Union bad ki dkhot ka KSU NEHU Unit, mynta ka sngi 30 tarik Risaw hynne ka sngi kila ker kut ia ka ophis treikam Administrative Block jong ka skulbah NEHU, haduh ba la pynlong ia u Vice Chancellor u Prof. Prabha Shankar Shukla ban hap ban wan mih bluit hapdeng ka shuti ba u la shim haduh ka 4 tarik Naiwieng.
Kane ka jingmih ki samla pule NEHU ka long hadien ba u VC u la mynthi ban phah mih ia u Registrar, u Retired Colonel Omkar Singh ban phah mih na ka jingïalang ka Academic Council kaba la long ha ka taiew ba la dep, bad dawa ruh ba dei ban weng kam ia ki briew ki bym tip eiei ha ki kam ka NEHU, kynthup Deputy Registrar (Academics) u Amit Gupta.
Na ka liang ki samla pule ki la dawa ruh na u VC ba udei ban thung ia ar ngut ki Pro Vice Chancellor, uwei ha Tura Campus bad uwei ha Shillong Campus. Katkum ka jingong kine ki samla pule, ka jingdawa ban don ia u Pro Vice Chancellor ka long ba un lah ban shim ia ki rai kiba donkam ha ka por bym don u Vice Chancellor. Katkum ka jong ong ki samla pule u Vice Chancellor tang shu la mih kano kano ka jingeh ha NEHU u la shim shuti ha ka jaka ban pynbeit ia ki kynrum kynram, da kaba kynnoh ruh ba u VC u bun sngi eh ba u don ha ophis ka long tang 10 sngi ha ka shibnai.
Phi don ban ong eiei?