Ba ai tiket ia ka kong Macdalyne, mih ki nongialam ka NPP na Nongpoh

Nongpoh:Ki nongialam ba hakhmat eh ka Party National People’s Party (NPP) ha Nongpoh Constituency, ha ryngkat bad ki spah ngut ki nongbud, myn hynnin ka sngi ki la pynbna paidbah ba ki iehnoh ialade na ka jinglong kum ki dkhot ha ka NPP, halor ki nongrim ba kim sngewtynnad ia ka rukom pynbna Tiket da ki heh ka NPP, kiba la shu ai jubor sha ka kong Macdalyne S. Mawlong, ba kan long kum ka kyrtong ka NPP na Nongpoh Constituency, hynrei khlem da iakren iathir ne kynjoh ktien na ki nongkitkam ka Party ha Nongpoh.

Kitei ki nongialam ka NPP Nongpoh Constituency, kiba la shim ia katei ka rai ban mih noh na ka Party, ki kynthup ia u bah C.B Syiem, MDC barim ka Nongpoh, uba dei kum u Adviser ka NPP ha Nongpoh, nangta u Bah Agustine Nongrum kum u President, u bah Tiplem Lymphuid, General Secretary, Delis Malai, President Nongpoh NPP Women Wing, u bah Thre Nongrum, Adviser, u bah Henry Nongrum, Organizing Secretary lem bad shibun kiwei pat ki nongialam ba hakhmat ka NPP na Nongpoh Constituency.

Kitei ki nongialam ba hakhmat ka NPP na Nongpoh Constituency, ki la pynpaw ba kim lah shuh ban shah halor ka jingshah niewbein ha ki heh nongialam ka NPP, ha kaba ki la pynbna ba ki la dep ban ai ia ka Tiket ia ka kong Macdalyne S. Mawlong, ba kan long kum ka kyrtong na Nongpoh Constituency, khlem ka jingtip ne ka jingiamynjur lang da ki nongkitkam ba hakhmat ka NPP na Nongpoh.
Ki nongkitkam ba hakhmat ka NPP Nongpoh, kiba kynthup ia u bah C.B Syiem, Adviser lem bad u bah Augustine Wahlang, Nongpoh, ki la ong ba katei ka jingleh bym suidniew da ki nongialam ba heh ka NPP ha ka jylla, ka la pynlong ia ki ba kim banse ban mih noh na ka Party, namar ka jingleh ki heh ka NPP ha Shillong, kaba ki la shu pynbna Tiket khlem ka jingiatip lang, ka la pyndiaw shikatdei eh ia ki nongialam bad ia ki nongkyrshan ba radbah ka NPP na Nongpoh Constituency.

Ki la buh jingkylli ruh ia ki hehduh ka NPP, ba kumno ki lah ban pynbna ba ia ka Tiket jong ka NPP na bynta u 2023, ba la ai sha ka kong Macdalyne S. Mawlong, kata khlem ka jingtip ki nongtrei ka party bad kiba la kynnoh ba katei ka jingpynbna Tiket ia ka kong Macdalyne S. Mawlong, ka la pynpaw shai ba ki la pynkhien ia ki kyndon treikam hapoh ka Party, namar ba ki la shu pynbna ai Tiket khlem ka jingtip jong baroh ki nongkitkam ka Party.
Kitei ki nongialam ka NPP lem bad ki nongkyrshah ka NPP, ki la ong ba dei halor kitei ki nongrim jong ka jingleh donbor da ki nongialam ba hehduh ka NPP bad ki bym shym la niewkor shuh ia ki para nongtrei ha ki Konstitwensi, ka la pynlong ia ki ba kin khylliap lama noh ia ka NPP ha Nongpoh Constituency, da kaba pynpaw ba lada ki iai don hapoh ka Party, kam don jingmut shuh ia ki, namar ia baroh ki kam la shah khyrwait shabi beit na ki bor ba shaneng.