Assembly ka kamra shongkai, District Council ka kamra shetja: Adelbert

Shillong, 13 Nohprah:
U MDC ka KHNAM na Jaiaw u Bah Adelbert Nongrum u la ong ba ki paidbah ka jaitbynriew ki dei ban sngewthuh ba ka Assmbly ne ka iing dorbar thawain ka jylla, ka dei kum ka kamra shongkai ha kaba ki briew bym dei ki trai shnong ruh ki lah ban wan bad shongkai, katba ka District Council ka dei kum ka kamra shetja ha kaba ki lah ban shong dei tang ki trai shnong.
Haba kren hynne ha ka jingpynlait paidbah ia ka thup kyrteng jong ka party na ka bynta ka MDC elekshon ban wan, u Bah Adelbert u la ong ba ka long kaba donkam ba kum ki paidbah ka ri Khasi ba kin jied ia ka party kaba ieng na ka bynta ka ri bad ka jaitbynriew. “Ka iing dorbar ka jylla ka long kum ka kamra shongkai katba ka district council ka dei ka kamra shetja, kaba dei trai tang ma ngi”, la ong u Bah Adelbert bad bynrap, ba ki paidbah ki dei ban sngewthuh ba ki don bun ki seng trai ri ha kane ka jylla hynrei ki dei ban bishar kaei kaba long seng trai ri kaba shisha.
U Bah Adelbert uba dei ruh u Vice President ka KHNAM, u la ong ba ia ka jylla da ka jinglaitluid hynrei ka long kaba sngewsih ba la ailad laitlan pynban ia kiwei ban wan rung. “Ka ILP ka long ka atiar ba donkam bha ban iada ia ka ri bad ka jaitbynriew rit paid”, la ong u MDC ka KHNAM.
U la ther ia u Myntri Rangbah ka jylla u Mukul Sangma uba la iaw na ka bynta ialade shimet. “U Mukul u la iam ialade shimet, bad lada ka jinglong jingman kan neh kumba long mynta, wat ki synran jongu ruh, kin sa iam lut”, la ong u Bah Adelbert.
U la ong ba haba ong nongialam kam mut ban klun lut, ban ioh lut ialade hynrei ka dei ban duh lut ialade na ka bynta ka ri bad ka jaitbynriew. Kumjuh u President ka KHNAM u Bah Pyndapbor Saiborn, u la ong ba ka ILP ka dang im ha kane ka jylla katkum ka Eastern Bengal Frontiar Regulation Act 1873 bad ka jingkam jong u Mukul ka dei tang ka jingthmu ban pynbeit ia ki paidbah ka jylla. Katba u Bah James Ban Basaiawmoit u la ong ba ka jingkren jong u Bah HDR Lyngdoh ba ki paidbah ka ri Khasi, ka mut ba u matlah bad kyllut. Lada u pule khubor, u peit ha TV ia ka jingialang ha madan Students halor ka ILP, um dei ban kren kumte”, la ong u Bah Basaiawmoit bad bynrap, Lada u Bah HDR u ong ba ki paidbah ka Sohiong kim kwah ILP, kata te lah ban ngeit hynrei ban ong ki paidbah ka ri Khasi, ngim lah ban pdiang’.