Artatien ka UDP Sohra ban kyrshan ka PDF ia u Dr Jemino

Shillong: Ki nongialam ka UDP Sohra khamtam na ka thain Khatar Shnong ki la artatien jur ia ka rukom leh jong u MLA ka Sohra uba dei na ka PDF u bah Gavin M Mylliem ha kaba iadei bad kane ka elekshon MP kaba dang shu dep shen.
Haba iakren bad uwei na ki nongialam ka UDP Khatarshnong u bah Riskhem Prang mynta ka sngi, u la kam ba kumba la ioh jingtip na ki nongkyrshan bad ki nongialam ka PDF na ka thain Khatarshnong, u MLA um shym la kitkhia ban trei na ka bynta ban kyrshan radbah ia u kyrtong ka Meghalaya Democratic Alliance (MDA) u Dr Jemino Mawthoh.
“Ngi la ioh jingtip ha kaba u MLA u la bthah ia ki nongkyrshan bad ki nongialam jongu ba kin leh katba ki sngew bit khlem da bthah ba kin kyrshan ia u kyrtong ka MDA”, la ong u bah Riskhem.
“Ka jingioh sngew ia kane ka sur na ki paidbah, ka long kaba sngewsih bad ki nongialam ka MDA, ki dei ban shim khia ia kane”, u la ong.
U Bah Riskhem u la kam ruh ba napoh napoh ka la don ka jingleh arsap u MLA ka Sohra da kaba phah kyrshan ia u kyrtong ka Congress.
Ha ki jingialang paidbah ruh um ju wan mih hynrei u la shu aiti ha ki briew jongu bad kane ka jingbym don ka jingiakitkhia lang bad ka jingleh arsap, ka la pyllong artatien ia u kyrtong ka MDA ban bat nam tam na Sohra.
“Watla katta, ngin sa peit ha ka result ha ka 23 tarik Jymmang ban tip haduh katno u kyrtong ka MDA un khur vote na Sohra”, la ong u bah Riskhem.
Lah ban kdew ba katkum ka jingtip la don ka jingartatien na kiba bun ki jaka ha kaba ki don katto katne ki paralok ka MDA kum ka NPP, PDF ki bym ai ka jingkyrshan kaba pura ia u kyrtong monlang u Dr Jemino uba iakhun na ka shap ka UDP ha kane elekshon MP ba dang shu dep.