“Artatien” ka Kyntien Khasi na ki Tyllong-ktien diakdiak!

Collin Wanñiang

Ha ka Ktien Khasi, lada phi ong “Artatien” bun na phi, phin sngewthuh beit “Bymthikhna”. Hato phi la ju pyrkhat kumno ka wanmih kane ka Kyntien “Artatien” ha ka Ktien Khasi? Lah ban don shibun ki Nia. Kawei na kita kaba don hi hapoh jong ka Kyntien, ka dei “Arta” kaba ha ka Ktien Khasi-Maram ka mut “Artylli” bad “Tien” kaba dei ka Jingthoh lyngkot ïa ka Kyntien “Ktien”. Kumta “Artatien” ka mut “Arta Ktien” lane “Artylli Ktien”. Lada phi mut ban leit sha kawei ka Jaka kaba “phim thikna”, kaba phi dang “artatien”, kaei ka Jingsngew hapoh dohnud briew? Jingsngewshngaiñ ne Jingsngewtieng? Ym lah ban len ha u babun balang – ka Jingsngewtieng!!
Hato ki Khasi, ha ka por ba ki thaw ïa kane ka Kyntien “Artatien” ban pynkit ïa ka Jingmut “Bymthikna”, ki la ringdur ïa kane ka Jingmut na ki Ktien tyllong bakhraw jong ka Por Hyndai: Greek, Latin, Sanskrit? Nga sngewdei ban kubur, wat lada ka Jingïadei ka long tang hangne hangtai ruh, ba ki Adkhia Khasi hyndai ki la don ka Jingtip ne Jingïasyllok bad kine ki Ktien hyndai kiba la kyllalong ki Thymmei-Tyllong bah jong ki Ktien bapher jong ka Juk mynta – Ban ong “Jingtieng” ha ka Ktien Greek, kawei na ki Kyntien kaba ki pyndonkam ka dei “deos” () kaba wan na ka Kyntien “duo” (uo), lane “Ar” ha ka Khasi. Kumne ruh ka paw ba ha kine kiwei ruh ki Ktien, ka Kyntien “artatien” ka mih na ka Kyntien “Ar” – ha ka Latin “dubbium” kaba kit ïa ka Jingmut “Arta”, ha ka French “doute”, ha ka English “doubt”; ha ka German lei “zweifel” ka mih pyllew na ka kyntien “zwei” kaba mut “Ar”. Kumta ruh ha ka Sanskrit-Hindi “duvidha” (&A5?’> ) kaba lah ban wan na ka kyntien “do” (&K ) kaba mut “Ar”. Na ka bynta ka Jingïadei hapdeng ka Jingmut “artatien” bad “tieng” lah ban ïohi shynna ruh ha ka Ktien French “doute” (artatien) – “redouter” (tieng) kaba paw ha ka English “redoubtable”. Kumne, ka pyni ba “artatien” bad “Jingtieng” ki don Thymmei-Tyllong ïasnoh bad ka Kyntien “Ar” – Ka lah ban dei namar ka “Jingtieng” ka ïaid ryngkat bad ka Jingsngew “artatien”, ngi sngew ‘arta’– ngi sngew ‘ar lynti’ shaphang kaei kaei ka bymthikhna. Ha ka Ktien Greek jong u Homer,ban ong ‘tieng’ – “deidimen” () ka dei kata ka Jingsngew ‘arta’- ka Jingsngew ‘ar lynti’ “en doie” ( ). – Iliad 9.230.