Shillong:Ka Deputy Commissioner jong ka East Khasi Hills distrik, ka Kong Isawanda Laloo, lyngba ka shithi ba la phah sha u Rev. Fr. Joby Joseph Manja kattil, St. Anthony’s College Shillong, ka la pynpaw ïa ka jingai khublei kaba kyrpang ïa u halor ka ka jingpyndonkam bad pynkylla ïa ka Mama Margret Hostel kum ka Post Covid 19 Facility.
Ha ka shithi ka DC EKHD ka la ong, “Nga pynpaw ïa ka jingsngewnguh ïaphi bad ïa u Rector bad ïa ka kynhun baroh kawei halor ka jingai jingmynjur sngewbha ban pynkylla ïa ka shibynta jong ka Mama Margret Hostel, Laitumkhrah sha ka Post Covid 19 Facility na ka bynta jong ki nongtrei ka Nazareth hospital bad nga kyrpad ba phi donkam ban ïatreilang bad ka Hospital halor kane ka bynta,” ong ka Kong Laloo.
Ha ka shithi ka la bynrap ruh da kaba ong, “Nga shim kane ka lad bad kabu ïa u Rector bad ïa ka kynhun baroh kawei halor kane ka jingsbun mynsiem halor ka jingim jong ki longbriew manbriew halor ka jingtyrwa ban pyndonkam ïa katei ka jaka.”
Shuh shuh ka DC ka la pynpaw ba ka jingïatreilang bad ka jingkyrshan halor ka jingpyrshang ban ïakhun pyrshah ïa ka thma jong ka jingpang khlam Covid 19 kan ïarap ïa ka jingïaid lynti ka jylla ban ïakhun ïa kane ka thma, pynkut ka jingthoh na ka DC EKHD kaba long ruh ka Chairperson DDMA.
Ha kawei pat ka liang, ka tyllong khubor ka ïathuh ruh ba na ka liang ka Balang Katholik ka la buh ruh ïa kumba 30 tylli ki jingthiah hapoh ka Don Bosco Hall, Laitumkhrah Shillong, ha ka sngi Saitjaiñ kum ka Covid 19 Care centre.
Phi don ban ong eiei?