Ar taiew sangeh treikam, ka MRB ba tied u pyrthat

Shillong, 10 Jymmang: Ka Meghalaya Rural Bank kaba don ha Nongtalang ka War Jaintia ka la sangeh ban treikam haduh jan dap shi bnai eiei mynta hadien ba ki tiar kompiwter jongka, ki la shah tied ha u pyrthat ha kine ki sngi ba jur ka eriong bad u slap.
Katkum ka jingai khubor ki paidbah ka Nongtalang, la iathuh ba kane ka tnad ka MRB kaba buh ban shakri ia ki paidbah katei ka thain, ka dang khang sah haduh kine ki sngi kaba la buh ka jingeh kaba sohsat ia ki paidbah khamtam kiba donkam ka sei bad ka thep pisa bad kiwei ki kam ba iadei bad ka bank.
“Ki la pyrshang ban shna ia ki kompiwtor hynrei kim lah leh eiei bad bun ki paidbah ba donkam ban sei tulop kum ki nongtrei ka Nongtalang College, CHC, bad kiwei ki ophis”, la ong uwei u rangbah na ka shnong Nongtalang.La iathuh ba kaba isangsot ka long ia kito kiba pang ba shitom, ki malik ba donkam ban sei pisa ban ai sha ki nongbylla ka la sahkut lut.
Na ka liang ki paidbah ka Nongtalang ki la kyrpad ia ka bor ba dei peit jong kane ka bank ba kin shim khia ban phah enjiniar noh wut wut ban shna pynbha ia ki kompiwtor khnang ban pynlait ia ki paidbah na ka jingeh bad ki la kyrpad ruh ban buh noh da ki tiar ba bha.