Ar sngi pan por ka KHADC, na ka sorkar; ban iakren ia ka CrPC, CPC

Shillong:Ki nongialam jong ka District Council, ki la pan por ar sngi na ka sorkar ban shim ia ka rai halor ka rai jong ka sorkar jylla, ban pyntreikam ia ka jingpynjlan ia ka jing treikam ia ka CrPC bad ka CPC ha baroh kawei ka jylla.

Mynhynnin ka sngi na ka liang ka sorkar, ka la khot ia ka jingialang ban ia kren halor ka jingpynbna, halor ka CrPC bad CPC bad ki Chief executive member (CEM) jong ki lai tylli ki District Council.
Haba ia kren bad ki lad pathai khubor, na ka liang u CEM ka KHADC u bah Titos W Chyne u la ong ba mynhynnin ka sngi, la ia tai halor ka jingtyrwa na ka liang ka Sorkar, ba la pynmih ia ka jingpynbna, ban pynjlan ia ka jingpyntreikam ia ka CrPC bad ka CPC ha ka jylla baroh kawei.

“Na ka liang ki District Council ngi la pynpaw ia ka jingpyrshah ban pyntrei kam ia kane ka notification ha ka jylla baroh kawei bad mynta ka sngi, ngi ka ioh ka jingkhot na ka sorkar ban iatai bha halor kane ka bynta”u la bynrap.
“Mynta ka sngi, ngi la ioh ban ia kren jylliew halor kane ka jingtyrwa jong ka sorkar halor kane ka bynta.Na ka liang ka sorkar ka la rai ban dang ai por ia ki district council ar sngi ban iatai bad ki stad ain ka KHADC bad hadien ar sngi kin sa wan rah ia kane ka mat ban ia kren halor ka ne ka jingtyrwa”la ong u Chyne.

U bah Titos u la ong “Ka jingthmu jong ka sorkar hi, ka long ban ai bor ia ki judicial magistrate kiba la thung da ka Sorkar, hadien ba la phiah ia ka Executive bad Judiciary”.
U la bynrap “Mynshuwa, haba ka executive bad ka judiciary, u Deputy commissioner bad u additional judicial magistrate ki dei ki judicial magistrate, ki la mih baroh ki judicial magistrate ha baroh ki district headquarters bad Sub division”.

U ka ong ruh “Kumba ka long mynta kine kim donbor bad ki khlem shah pynkhamti ia ki ban bishar ia ki mokotduma, ka Sorkar ka kwah ba kine ki ingbishar kiba la buh ha district bad sub division kin trei kam noh khnang ba kin lah ban ai jingmyntoi”.
U bah Chyne u la ong “Ha ka jingialang na ka liang u Myntri rangbah u la pynthikna ba kane ka notification kan ym don kano kano ka jingktah ia ki ingbishar ka district council”.

“Ha kaba ia dei bad ka notification ngi dang donkam ban bishar bha bad ngi khlem pat kohnguh mynta ka sngi, hynrei ngi la pan por ar sngi ban bishar bha ha ryngkat ki MDC jong ki KHADC”u la bynrap.