Ar sngi, ar kynhun kiba leit dawa Patharkhmah Civil Sub-Division

Nongpoh:Shi sngi ba ki nongkitkam ka Patharkhmah Civil Sub-Division Demand Committee, ha ryngkat ka jingsynranlang u Bah Sosthenes Sohtun, MLA Jirang, nangta u Dasakhiatbha Lamare, MLA Mawhati bad uba long ruh kum u Myntri ki kam ri Dohkha, nangta u Bah Victor Rani, MDC, u Ma Ngaitlang Dhar, MLA barim ka Umroi lem bad kiwei, ki la leit ban kynduh ia u Conrad K. Sangma, Myntri Rangbah ka sorkar jylla, kata na ka bynta ban iakren halor ka jingdonkam ban kyntiew kyrdan noh ia ka Patharkhmah Administrative Unit sha ka Civil Sub-Division, da kaba ong ba ka thain Patharkhmah, ka la donkam kyrkieh ban kyntiew noh sha ka kyrdan Civil Sub-Division.

Hynrei ha ka sngi kaba bud pat, sa ki nongkitkam ka Ri Bhoi Dorbar, ki la leit biang ban kynduh Myntri Rangbah, na ka bynta ban iakren halor katei kajuh ka phang, kata ka long ban iakren halor ka jingdonkam ban kyntiew kyrdan noh ia ka Patharkhmah Administrative Unit sha ka Civil Sub-Division, nalor kiwei pat ki mat kiba iadei bad ka jingdonkam ki paidbah hapoh ka District.

Ka long ruh ka jingshisha ba ia ka Patharkhmah Civil Sub-Division Demand Committee, ym pat da iohsngew ha ki lad pathaikhubor, halor ka jingdawa ban kyntiew kyrdan noh ia ka Patharkhmah Administrative Unit sha ka Civil Sub-Division, hynrei ia kata ban batai ym nud, ioh lehse ba ka la iaid shakhmat napoh napoh katei ka jingdawa jong ki, pynban kaba la pynpaw pyrthei eh ka dei ha ka sngi kaba ki la leit ban kynduh Myntri Rangbah, kata nalor ka jingsynran u MLA bad kumjuh ruh u Myntri ka sorkar jylla.

Ha kawei pat ka liang, ym lah ban len ia ka jingshisha ba ki nongkitkam ka Ri Bhoi Dorbar, ki la pynlong jingialang khah khah ha Umsning, na ka bynta ban pynsngew ia ka jingdawa jong ki ban kyntiew kyrdan noh ia ka Patharkhmah Administrative Unit sha ka Civil Sub-Division bad ha manla ba don ka jingialang jong ki Ri Bhoi Dorbar, la iohi tang ia laingut ki MLA na Ri Bhoi, kiba kynthup ia u Bah Mayrald Born Syiem bad u Bah George B. Lyngdoh, kiba dei ki MLA Congress, nangta u Bah Jason S. Mawlong, MLA ka PDF, lait nangta ki MLA na ka NPP, kiba kynthup ia u Bah Sosthenes Sohtun lem bad u Dasakhiatbha Lamare, ym ju kham iohi ba kin leit iashim bynta ha manla ba don ki jingialang ka Ri Bhoi Dorbar.

Ha man ba don ki jingialang, ki nongkitkam ka Ri Bhoi Dorbar, ki ju iai pynpaw ba ka Dorbar hi ka ju khot ia baroh ki Nongmihkhmat na Ri Bhoi, la ka long ia ki MLA ne MDC, ba kin wan iashimbynta halor ka jingiadawa Patharkhmah Civil Sub-Division, hynrei ki nongmihkhmat kiba dei na ka Party NPP hi kim ju wan hi tdot.

Ka jingkylli kaba mih halor ka jingdawa Patharkhmah Civil Sub-Division, ka long mano ban iohnam lada ka sorkar kan kyntiew kyrdan ia ka Patharkhmah Administrative Unit sha ka Civil Sub-Division, la ka nam kan leit sha ki nongkitkam ka Ri Bhoi Dorbar ne Patharkhmah Civil Sub-Division Demand Committee, namar na kaei kaba paw sha pyrthei ka long ba ki la don ar-kynhun kiba la dawa Patharkhmah Civil Sub-Division bad kitei ki kynhun ki ju kam ba ka jingdawa jong ki, ka long na bynta ka jingmyntoi ki paidbah ha Ri Bhoi Sepngi.