Nongpoh: U Bah Sosthenes Sohtun, MLA ha ryngkat u Bah Victor Ranee, MDC ka Jirang Constituency, hynne ka sngi ki la hiar sha ka shnong Patharkhmah, na ka bynta ban leit aiti ia ki khaw kaba ki la thied kyrpang, na ka bynta ban sam sha ki longiing baduk kiba sah ha katei ka thain.
Lah ruh ban kdew hangne, ba nangduh ka sngi kaba u MLA bad MDC ka Jirang Constituency ki la thaw da ka Relief Committee, kaba la donlang da kiwei ki riew rangbah bad ki nongialam niam, kumta lyngba katei ka Committee, ki la lah ban thied ia 2 hajar byrni u khaw, na ka bynta ban iarap ia ki longiing baduk kiba don hapoh ka Jirang Constituency.
Na ki 2 hajar byrni ki khaw kaba la thied lyngba katei ka Committee, la shim ia ka rai ban sam 1 hajar ia ki longiing baduk kiba hap hapoh ka Jirang Block bad 1 hajar byrni yn sam ia kito ki longiing baduk kiba hap hapoh ka Umling Block ka Jirang Constituency.
Haba leit ban sam ia u khaw sha ki longiing baduk ka Jirang Block, u MLA ka Jirang, u la leit ruh ban sam Sanitizer sha ka CHC Patharkhmah, ha ryngkat ka jingnoh pisa kaba T. 20 hajar.
Haba kren ha katei katei ka sngi, u MLA ka Jirang, u la pynpaw ia ka jingsngewkhia halor ka jingeh kaba la iakynduh da ki paidbah ha kaba kum kane ka por bad u la ong ruh ba dei na kata ka daw kaba la pynlong ia u kum u nongmihkhmat ba u shim khia ha ka ban thaw ia katei ka Committee, khnang ban ioh iarap ia kito ki longiing baduk.
Lyngba jong katei ka sngi, u MLA ka Jirang, u la kyntu ia ki paidbah bad ki riew rangbah ba kim dei ban wanrah ia kino kino ki jingsngew Politik, hynrei ki dei ban trei bad ban iarap na ka bynta jong kito ki longiing kiba mad ia ka jingeh ban ioh ia ka bam ka dih kaba thikna.
Phi don ban ong eiei?