Ap U DC, ia ka hukum jong ka Supreme Court

Shillong, 10 Naitung:
U Deputy Commissioner ka East Khasi Hills district u dang ap ia ka kopi ia ka hukum ka Supreme Court ban sangeh ia ka jingtah laha ia ka iing bangla u MLA ka Jirang u Bah Lambok Mylliem ngap. ”Ngin leh ia kaba donkam hadien ba la ioh ia ka kopi jong ka hukum ka Supreme Court”, la ong u u Deputy Commissioner ka East Khasi Hills u Sanjay Goyal uba la mih noh kum u DC mynta ka sngi.
U la ong ba la pan ia ka jubab na u nongiasaid ain ka sorkar jylla, halor kane ka hukum ka Supreme Court.
Ka Supreme Court ha kane ka sngi Palei, ka la bthah ka dei ban sangeh shwa ia ka jingtah laha ia ka iing bangla u Bah Mylliemngap na ka bynta khadsan sngi.
Ka Kashari ka la pynmih ia kane ka hukum hadien ba u Bah Mylliemngap u la ujor da ka  Special Leave Petition bad ka la bthah ba un ujor biang sha ka High Court da kaba rah ia ka hukum na ka Supreme Court ba um shym la pynkhein ia ki kyndon jong ka Meghalaya Urban Development Authority (MUDA) ha ka rukom shna iing.
 Saw ngut ki nongsaid ain ki la mihkhmat ia  u MLA ka Jirang ba kynthup u Nidhesh Gupta, Shaurya Sahay, Ankit Rajarhia bad u Amit Kumar.
Dei ha ka 23 tarik Iaiong ba ka bor synshar district administration ki la tah laha ia ki 12 tylli ki iing bangla ba dei jong u Narayan Prasad Jhunjhunwala (Khyndai Lad), Nilesh Tibrewalla (Thana Road), Satyabrato Baidya (Jail Road), Ajit Das Gupta (Jail Road), Bidur Das (Jail Road), Uday N Shukla (Oakland Road), Rajkumari Sinha (Bivar Road), Mentok Ri-Project Pvt. Ltd (Bivar Road), Maruf Elahi (Bivar Road), Beroline Khongshei (Laban), Mohendro Rapsang (Keating Road) bad Saini Pala (Motinagar).
Kham hadien, sa 12 tylli ki iing  bangle la pyngat shuh ba ki la pynkhein ia ki kyndon shna ka MUDA ka Meghalaya Building Byelaws, 2011.
Kine kiba la shah pynngat ki kynthup jong u Sanjib Das (GS Road,Khyndai Lad), Manchin Fincon Pvt Ltd (Jail Road), Kenneth M Lyngdoh (Bivar Road), Sanjay Jhunjhunwala (Bivar Road), Modrick Nongkynrih (Bishop Cotton Road), BD Marbaniang (Demseniong), Lamboklang Mylliemngap (Motinagar), Dr TA Sohklet (Lummawrie), Allenwood Swer (Fire Brigade), Secretary ka Islamia Secondary School (GS Road, Khyndai Lad), P Dkhar (Laban) bad Nicolas Wallang (Boyce Road).