Shillong:Ki ar ngut ki nongmihkhmat ka United Democratic Party (UDP) ba kynthup ia u Bah Titos W Chyne, MDC na Sohra uba dei ruh u Chief Executive Member ka KHADC lem bad u Bah Balajiedkupar Synrem, MLA na Shella ki la leit ban ia kynduh ia u Myntri Rangbah ka Jylla, Conrad K Sangma ban pynkynmaw ia u halor ka jingdawa ban kyntiew kyrdan District noh ia ka Sohra Civil Sub-Division.
Kine ki nongialam ka United Democratic Party (UDP) ki la pynkynmaw biang ïa u Myntri Rangbah ka Jylla ba un shimkhia lem ban pynurlong ïa ka jingangnud jong u MLA barim ka Shella, Dr. Donkupar Roy (bam kwai ha Dwar u Blei) uba dei ruh u Lamphang barim ka Iing Dorbar Thawaiñ ka Jylla ban kyntiew noh ïa ka Sohra Civil Sub-Division sha ka kyrdan District.
“Ka jingiakren ka la long kaba seisoh bha ha kaba u Myntri Rangbah u la kular ban ap sa tang ia ka por ban pynurlong ia ka, namar ba dang don ki jingeh katto kattne na ka liang ka Sorkar, hynrei ka jingiakren hi ka la long kaba don ka jingkyrmen skhem”, la ong u Bah Titos W Chyne uba la kdew ba kane ka jingangnud ka dei kaba la kham jong ki paidbah nongshong ka thaiñ.
Phi don ban ong eiei?