Ap pisa ka sorkar na ka NEC ia ka surok Mairang-Ranigodown

Shillong, 05 Risaw:
U Myntri surok ka jylla u Bah Sñiaw bhalang Dhar u la ong ba ka sorkar jylla ka dang ap pisa shuh shuh ban ioh na ka North Eastern Council (NEC) na ka bynta ban shna ia ka surok ba 85 km na Mawngap-Mairang-Ranigodown kaban pyniasoh ia ka Meghalaya bad ka Assam.
“Ka la don ka jingslem ban pynlait pisa namar ka jingbym lah ka sorkar jylla ban aiti ia ka Utilisation Certificates (UCs)” la ong u Bah Dhar.Katkum ka thymmei khubor, kawei na ki daw ba kongsan ba slem ban ai ia ka UC ka dei namar ba don khyndiat ki kontraktor kiba trei bha ban pyndep ia kane ka surok.“Kane ka jingpynslem ka ju don beit haba don shibun ki kontraktor kiba ioh ban pyntrei ia kano kano ka kam bad kane ka dei ka jingeh”, la ong thymmei khubor.Ha kajuh ka por, u myntri ka tnad surok u la ong ba ka sorkar ka kwah ban iohi ia ki briew ba kin ioh ban pyndonkam noh ia katei ka surok haba ki leit sha kad liengsuin ha  Guwahati.
Hynrei na ka liang u Chief Engineer PWD ( Border Roads & NEC Works ), Assam  ha u Rymphang mynta u snem u la khot tender ban pynbha ia ka surok Mairang Rani godown Azara ba la mang na ka skhim NEC jong ka 11th Five Year Plan Programme ha ka jinglut kaba T. 30,155,000 lak.Haba kylli ha kano ka dur ba ka Assam ka la khot tender ia kajuh ka surok, u myntri u la ong ba ka Assam ka la khot tender ia ki jaka ba hap hapoh jongka.”Ka surok kaba hap ha Meghalaya ka kut tang ha khyrdop ka Ranigodown. Ngi sdang ban pynbha ia ka surok tang ha ki jaka ba hap ha ka jylla Meghalaya” la ong u Bah Dhar.