Ap ki MLA pyrshah Mukul, ban ai rai ka Sonia

Shillong, 7 Nailur:
Hadien ba la dep ka jingiakren bad u general secretary ka AICC ba peit ia ka Meghalaya u Luizi nhu Faleiro ha kane ka sngi Thohdieng, na ka liang ki MLA ka Congress kiba iakhun dohiap ban pynkhyllem ia u Dr Mukul Sangma na ka shuki myntri rangbah ki la shu ap beit ia ka rai ban ai da ka president ka Sonia Gandhi.
Ki MLA ba pyrshah ia u Dr Mukul kim hun khlem ioh ia ka jubab na ka Sonia Gandhi la kan bujli nongialam ne kan pynneh ha kane ka jylla hadien ba ka la ong ba kan ai ia ka rai ha ka jingiak ynduh jong ki kham mynshwa.
“Ka la kular ba kan peit kan ai ia ka rai halor ki jingpynsngew ba ngi rah ha ka jingiakynduh mynshwa bad ngi kyrmen ba kan rai ia ka kaba biang”, la ong u MLA ka Congress.
“Ngim da khmih lynti ba kan shu ai noh mynta, ngin ap ba kan sa ai hadien katto katne por”, u la ong.
Lah ban kdew ba ha kane ka sngi Thohdieng, u Faleiro u la ong ba ka jingpynneh ne ka jingweng ia u Dr Mukul Sangma kan shong ha ka rai jong ka Sonia Gandhi.