Ap kaiphod post mortem, ki pulit ia u samla ba dkut khlieh

Shillong, 14 Jylliew:
Ki pulit ka nong bah ki dang ap ban ioh ia ka report ka post mortem ia ka met jong u samla Samuel Synrem (23) uba la lap ha kaba ka khlieh jongu, kam don shuh na kawei ka jaka na Kyndong Rylla, ka wah Umiam ha ka 11 tarik Jylliew hadien ba la u la jah bun sngi.
Ia ka met jong u Samuel Synrem uba la suba ba shah rah ha ka um, la lap na katei ka wah hadien ba la pynlong ia ka jingwad bun sngi hadien ba u la iakynduh ia ka jingjia aksiden ha jing kieng jingthang briew ha ka 21 tarik Jymmang.
U Superintendent of Police (City) u Bah Vivek Syiem u la ong ba ka jingiap ka long kaba pher bad na ka liang jong ki pulit ki dang pynlong ia ka jingtohkit ban wad ioh don kano kano ka daw halor kane ka jingjia.
Lah ban kdew ba ia u Samuel Synrem uba dei na Jaiaw Laitdom la iathuh ba u la jah naduh ka 21 tarik Jymmang haba u dang leit shim pisa na ka thain Polo.
Ka la don ka jingong ba u la iakynduh ia ka jingjia aksiden katba u dang shong bike ha Jingthangbriew, Jaiaw bad u hap shapoh ka jingkieng ha ka Wah Umkhrah.
”Lada ka dei kaba shisha ba u iakynduh ia ka jingjia aksiden bad hap shapoh ka wah lane ka don eiei ha lyndet halor kane ka jingjia, ki pulit ki dang bishar bniah ia kane”, la ong u Bah Vivek.
”Mynta ngi dang ap ia ka report ka post mortem bad ngin dang wad ruh ia ki jingshisha halor kane da kaba bishar bniah na baroh ki bynta ban lap ia ka jingshisha” la bynrap u Bah Vivek.