Ap ka jingiashrut bajur hapdeng ki nongshong shnong, namar ki kam Pynthor Sohma bad Umsarang

Nongpoh:Ki briew nabar bad kiba shu peit ne sngap lyngba ki lad pathai khu bor halor ka jingiakynad hapdeng ki briew ha Pynthor Sohma bad Umsarang ha Ri Bhoi, ki lah ban shim ba ka khein sting ne shim ba ka dei ka jingiakynad kaba rit, hynrei haba sngap na ka jingkren ki briew na kitei ki ar-shnong, katei ka jingiakynad kam dei kaba malu mala, hynrei ka dei ka jingiakynad kaba jur ka ban bthei ha kano kano ka por bad kaba lah ban wan ia ki jingjia ba sngewsih.

Kumta haba ia dei bad katei ka jingia kynad hapdeng ki briew na ka dong Pynthor Sohma bad Umsarang, ka donkam kyrkieh ia ki bor ba deipeit, la ka long na ka Hima Mylliem, Khy riem, District Council bad kumjuh ia ki Bor District ka Ri Bhoi, ba kin shim khia ha ka ban tem ne ban pynbeit noh ia kitei ki kynrum kynram, khnang ban lait na ki jingjia ba sngewsih hadien babud.

Na kaei kaba la lap ha ka por ba ki paidbah ka shnong Umsarang, ki la iamih paidbah ban pynrem halor ka jingkynnoh kaba khlem nongrim da ki briew na Pynthor Sohma, la sngewthuh ba ka nongrim kaba la pynlong ia kitei ki briew na shnong Umsarang ba ki bitar ia kaba la leh da kiba shong ha Dong Pynthor Sohma, ka dei namar ba ki ki la don ki briew kiba sah ha katei ka Dong ha ryngkat ki ki briew na Hima Khyriem, ki la leh buittuh bad ban pynioh Sanad Rangbah shnong ba sop sop sha ki briew ha ka Dong Pynthor Sohma, khnang ba kin ioh pyni paidbah ba katei ka Pynthor Sohma, ka la dei ka shnong kaba pura.

Katkum ka jingiathuh da ki briew na ka shnong Umsarang, kaba hap ha Hima Mylliem, la ong ba ka Pynthor Sohma, ka dei tang ka Dong jong ka shnong Umsarang, hynrei namar ba don ki briew kiba don hapoh katei ka dong ha ryngkat ki briew na Hima Khyriem, ki la leh khlieh shrieh bad ban pynioh Sanad rangbah shnong ia uwei na ki riew rangbah kiba don ha katei ka dong, kaba la pynlong ban wanrah ia katei huri hura bad kaba la ktah wat ia ka shnongsuk shongsain ha katei ka shnong.

Namarkata, haba phai halor ki kynrum kynram hapdeng ka shnong Umsarang bad ka shnong Pynthor Sohma, kumba ka la paw pyrthei, ka long kaba donkam eh ia ki bor ba deipeit ia ka shongsuk shongsain ha ki shnong ki thaw, ba ki shimkhia ha ka ban pynbeit, khnang ban lait na ki jingjia ban sngewsih hadien habud, namar katkum ka jingkren na ki riew paidbah la sngewthuh ba katei ka jingiakynad kam dei kaba malu mala, hynrei ka dei ka jingiakynad kaba hap ban shimkhia.