Ap jubab ka UDP, na ki seng trai ri, ban pynbna kyrtong MP

Shillong, 18 Naiwieng:
Wat la u President ka UDP u Dr Donkupar Roy u la pynbna ba u Bah Paul Lyngdoh un long u kyrtong MP na Shillong Parliamentary constitueny hynrei ka party ka dang ap pat ia ka sur na kiwei ki party bym dei Congress ban shim ia ka rai ba khadduh.
Ka State Election Committee (SEC) ka UDP ka la rai ban ap ia ka jubab na kiwei ki party ha kane ka jylla lait noh ka Congress ban shim ia ka rai ba khadduh na ka bynta ka kam kyrtong MP na Shillong Parliamentary na ka bynta ka Lok Sabha elekshon ha u 2014. Ka UDP ka la rai ban pynieng ia u Bah Working president Bah Paul Lyngdoh na Shillong Parliamentary seat. “Ngim pat shim ia ka rai ba kut ban pynbna ia u kyrtong na ka bynta ka MP elekshon namar ba dang ap ia ka jubab na kiwei ki party ban kin kyrshan ia u kyrtong ba la tyrwa ka party” la ong ka thymmei khubor na ka UDP ha kane ka sngi Nyngkong.
Katkum ka thymmei khubor na ka party, ka UDP ka la phah iasyllok ia kiwei ki party bym dei Congress kum ka BJP, KHNAM bad ka HSPDP.
“Ngi kyrmen ban ioh ia ka jubab kaba kmen na baroh ki party” la ong ka khubor na ka UDP. Shwa ia kane, ka UDP ka la rai ban pynlong ia ka jingiakren iasyllok bad ka BJP, KHNAM bad ka NPP shwa ban pynbna ia u kyrtong MP na Shillong Parliamentary constituency.
“Ka party kan kyrpad ia ka HSPDP ban phaidien biang ia ka rai ban kyrshan ia u kyrtong shimet u Rev PBM Basaiawmoit. Bad kumjuh ruh ia ka KHNAM kaba la pynbna kham mynshwa ban kyrshan ia u Rev Basaiawmoit. “Ngi dang pan ia ka jingkyrshan jong ki party lait noh ka Congress ban sei ia u kyrtong iamonlang ban iakhun pyrshah ia u kyrtong ka Congress. U kyrtong un dei uba tbit ha ka sain pyrthei ban leit rah ia ki mat jong ka jaitbyntiew ha parliament kahmtam ba ka dei ka bynta jong ka North East Regional Political Front (NERPF) kaba dei ka kynhun iateh lok bad ka NDA ha ka ri”, la ong ka khubor na UDP.