Ap jingma, naba synjor ka jingkieng Lailad

Shillong, 31 Naitung:
Ka jingma kaba khraw ka ap ia ki paidbah nongleit nongwan jong ka thain Ri-Bhoi Sepngi namar ka jingsynjor ka jingkieng Lailad, kaba don ha ka shnong Umsohma kaba la pynieng halor ka wah Umtru. Ki nongthohkhubor ki la lap ba katei ka jingkieng ka la tor bha bad ka la khih wat haba iaid tang ka kali rit ruh, katto katne por ki nongthohkhubor ki la ieng halor katei ka jingkieng hynrei kaba kham sngewtieng ka long ba tang haba beh ka lyer ruh ka jingkieng ka la khih hi. Katei ka dei ka jingkieng ba la plie paidbah da u bah D.D Lapang ha u snem 1992 ha ka por ba u la long u myntri rangbah ka jylla , katei ka jingkieng kaba pyniasoh ia ki spah tylli ki shnong jong ka Ri-Bhoi Sepngi kaba kynthup ia ka Patharkhmah.
Ha katei ka jingleit jurip ia katei ka jingkieng ki nongthohkhubor ki la ioh ban ia kren bad u Rangbah Shnogn jong ka Sohkhwai u bah Turban Lyngdoh uba dei ruh uwei na ki dkhot ka Synjuk Nongsynshar Shnong ki 10 tylli ki shnong kiba don marjan bad katei ka jingkieng. Ha ka jingiakren bad utei u rangbah u la iathuh ba katei ka ijngkieng ka la tor la kumba katto katne snem mynta bad hadien ba la iohi ia kane ka Synjuk ki 10 shnong ki la leit ban ud sha ki bor sorkar la arsien bad kaba u kynmaw u la ong ba dei ha u bnai kyllalyngkot mynta u snem ba ki la wan khadduh eh bad hadien katei katto katne bna mynshuwa la wan ban jurip ia katei ka jingkieng da ki bor pyniaid District bad ki la kular ha ki rangbah jong katei ka Synjuk 10 shnong ba kin pyntip sha ka tnad PWD ba kan leh ia kaba donkam, “Hynrei sngewsih ba haduh mynta ruh ngim pat iohi dak eiei” ong u bah Lyngdoh.
Utei u rangbah u la ong ba jin lada ym dei ki bor shnong ki ban shimkhia ban sumar ia katei ka jingkieng ym tip shuh kumno kan long mynta namarba u ong ba ha ka por ba la khang dewiong ki trok dewiong ki la iaid tuh na katei ka surok ban mih sha Umling hynrei na ka por sha ka por ki bor shnong ki la leit ban pahara bad ban ym ailad ia ki trok kit dewiong. La iohi ba hakhmat katei ka jingkieng la wah ia ka Sign board kaba heh kaba la thoh bay m sha ban kit palat 9 ton, hynrei u bah Lyngdoh u la ong ba ki trok kim patiaw bad ki trok shiphew shaka ruh ki iaid beit. Kitei ki trok u la ong ba ki dei kiba kit maw sha ki jaka pyntrei surok ki kompeni ha katei ka thain. Ha ka jingleit jurip ki nongthohkhubor la iohi ba ki nar kiba pyndait ia katei ka jingkieng ki la bam sarang bad don ki bynta kiba la dkut , don kiba shu sah kyrdoh malu mala kiba jan dkut syndon.