| Nongpoh: Ki paidbah nongshong shnong ka Baridua ki la pynpaw ia ka jingsngewkhia kaba jur halor ka jingbym peit da ka tnat Bording na ka bynta ban pynbha ia ki Post Ilektrik kiba la synjor kiba don ha katei ka shnong.
Katkum ka jingiathuh da ki paidbah jong katei ka shnong, ki la ong ba kitei ki Post Ilektrik kiba la synjor ki dei kiba la thung ha ki jaka iaid jaka ieng jong ki paidbah nongshong shnong bad ha kajuh ruh ka por ka dei ruh ka jaka kaba shait ialehkai ki khynnah. Ki la ong ruh, ba ka jingdon jong kiba kum kitei ki Post Ilektrik kiba la synjor, ki lah ruh ban wanrah jingma ia ki paidbah bad khamtam eh ia ki khynnah, namar ka jinglong jongman jong kitei ki Post Ilektrik kim long shuh kiba ishngain, ha kaba ki lah ban khyllem ha kano kano ka por bad kaba lah ruh ban wanrah ia ka jingmynsaw jong ki paidbah. Namarkata, naka bynta ban lait na kino kino ki jingjia kiba sngewsih, ki paidbah ki la kyntu ia ka tnat bording ba ka dei ban shimkhia ha ka ban maramot lane ban thung thymmai noh da kiwei. |
