Ap jingma ka surok ha Klangrin ia ki paidbah nongleit nongwan

Nongstoin, 13 Nailur:
Ka jingjur jong u slap myn ha ki bnai ba la dep ka la wanrah shibun ia ka jingtwa khyndew kaba jur ha ki bynta jong ka WKHD, bad bun na ki jaka ba twa la maramot bad don pat ki katto katne ki jaka ki bym shymla maramot satia haduh mynta, bad kaba la pynlong ia ki paidbah ban shem jingeh ha ka iaid ka ieng namar ka jingsahkut ki kali bad kaba lah ruh ban long ka jingma ia ki paidbah.
Kawei na ki surok kaba u Rupang u la lap kadei ka surok markhap bad ka Shnong Klangrin WKHD, ha kaba ka kynroh kaba kyrshan ia katei ka surok kala twa noh namar  ka jingjur jong u lap bah bad tang shu bakla tiak katei ka surok kan khyllem beit sha ki bynta ba long riat.
Katei ka surok ka pyniasoh ruh ia shibun tylli ki shnong naduh Klangrin ter ter sha Nonglang,  Langpih, Tynghor bad bun tylli ki shnong khappud, katei ka surok kaba la synjor ka lah ban wan rah ia ka jingeh ia ki paidbah katei ka thain ba dei iaid lyngba katei ka surok bad ka lah ruh ban wanrah ia ka jingjia kaba sngewsih namar ka jingsynjor jong katei ka surok kaba la twa ka kynroh.
Kumta ki bor ba dei peit ki hap ban leh ei ei noh kham kloi khnang ba kan nym wanrah ia kano kano ka jingjia ka ba sngewsih ia ki paidbah nongleit nongwan kiba ju iaid lyngba katei ka surok.