Ap jingma ka skul Tirot Sing Memorial Govt. UPS Nongkhlaw

Nongstoiñ: Ka Skul Tirot Sing Memorial Govt. UPS kaba don hapoh ka shnong Nongkhlaw West Khasi Hills District, ka dei ka skul sorkar ha ka kyrteng jong u Syiem ba khraw ka Hima Nongkhlaw pynban haba peit ia ka jinglong jingman jong katei ka ïing skul, ka long kaba i sangsot haduh katta katta namar ba katei ka skul ka la synjor bha bad la da ki snem kala shu ïeng jubor tang da kaba shu shan da ki tieng sawdong na ki bynta ba shadien.
Shuh shuh haba peit ia katei ka ïing skul la iohi ruh ba ka la don ka jingshan ban pynneh jubor ia katei ka ïing skul da ki dieng sawdong na sha ki bynta ba shadien jong ka skul khnang ba kan lait na ka jingkhyllem bad kane ka buh jingma ruh ia ki khynnah bad kumjuh ia ki nonghikai ha katei ka skul namar ba katei ka ïing skul ka lah ban khyllem ha kano kano kapor namar ba katei ka jingshan pynneh ia ka ïing skul ka la slem bha.
Ym tang kata la ioh jingtip ruh ba kaba la pynlong ia ki bor pyniaid jong katei ka skul ban shu shan pynneh jubor ia katei ka ïing skul kadei namar ba ha ki snem kiba kham mynshwa kala don ka jingkhie eriong kaba jur bha ha katei ka shnong kaba la pyrshang ruh ban rat ia katei ka ïing skul kumta ban lait na ka jingkhyllem la ong ba ym banse ban hap shu thaw lad kumno ban pynskhem ia katei ka ïing skul kata da kaba shu shan noh da ki dieng sawdong na ki bynta kiba shadien jong ka skul.
Na ka liang jong u nongthoh khubor u la ioh lad ruh ban iakren bad u wei na ki riew rangbah jong ka thaiñ Nongkhlaw u ba dei ruh ha kajuh ka por kum u President jong ka Seng Rimen Shiliang Khri Environment Sport Social Organaisation u bah S. Lyngdoh ha kaba u la pynpaw ia ka jingsngew lehrain ban ong ba kat ka skul sorkar ha ka kyrteng u Syiem ba khraw ka Hima Nongkhlaw ka long kaba jot ba pei bad kaba synjor.
Shuh shuh u la iathuh ruh ba na ka liang jong ka Seng ki la leit ruh ban iakren bad ki bor pyniaid jong katei ka skul bad la ong ba na ka liang jong ka skul lah kham slem kala dep ruh ban phah ia ka proposal na ka bynta ka ïing skul kaba thymmai sha ka sorkar te hynrei haduh kine ki sngi ym shym pat la iohi satia kano kano ka daw na ka bynta kata ka ïing skul kaba thymmai.
Kumta na ka liang jong u bah S. Lyngdoh u la kyntu ia ka sorkar ba kan pynkloi na ka bynta ban pynioh noh ia ka ïing skul kaba thymmai na ka bynta jong katei ka skul khamtam ba ki khynnah bad ki nonghikai jong katei ka skul kin lait na ka jingma kaba ap lyngba ka ïing skul kaba la tor bad kaba lah ban kyllem ha kano kano kapor kaba lah ban wanrah pynban ia ki jingjia kiba sngewsih.