Pynursla,13 Jymmang:
Ka jingkieng Wahtyr saw, kaba pyniasoh ia ka shnong Pynter bad ka Nongshyrngan, ki shnong kiba don harum Pynursla, ka la wanrah jingma kaba khraw ia ki paidbah namar ba katei ka jingkieng nar ka la jan dkut. Katei ka jingkieng ka jngai kumba 5 minit ban hiar da ka kjat na Pynter bad kumjuh ruh na Nongshyrngan, bad haba kiew pat sha shnong ka bam por kumba 15 minit eiei.
Ki la don katto katne ngut ki riew paidbah kiba la pyntip sha u nong thoh khubor halor ka jingma kaba –ap ia ki nongleit nongwan lyngba katei ka jingkieng. Hadien ba la ioh jingtip na ki riew paidbah u nongthohkhubor u la ioh ban ia kren bad u Rangbah Shnong ka shnong Pynter u bah Kyrdan Khongthaw ban kylli shaphang katei ka jingkieng.
U Rangbah Shnong u la kubur ba katei ka jingkieng ka la jan dkut bad ka buh jingma ia ki nongleit nongwan, ha kaba u la iathuh ruh ba lyngba katei ka jingkieng ym tang ki nongleit bri kiba iaid lyngba hynreie man ka sngi ki paidbah ba leit beh ha ki kam ki jam jong ki , ki iaid lyngba katei ka jingkieng. U la ong ba kham mynshuwa na ka liang ka shnong ka la dep ban maramot hi haduh ar-lai sien ia katei ka jingkieng, kaba ka shnong ka la siang noh da ki lyntang ha ki jaka iuh kjat, u la iathuh ruh ba na ka bor shnong ki la pyrshang ban ia kren bad ki nongmihkhmat ka thain ban pan jingiarap na ka bynta ban shna pynbha noh ia ka jingkieng Wahtyrsaw hynrei u la ong ki nongmihkhmat ki la kyntu ba ki paidbah kin iaishah shuwa namarba ki la don kiwei pat ki jingtrei ba ki nongmihkhmat ki la ai sha ki shnong. “Ngi la wan mih sha ki nongmihkhmat hynrei namarba ka shnong ka dang ioh jingtrei na ki, ki la kyntu bangin iaishah shuwa katto katne por bad yn sa peit hadien” ong u Rangbah Shnong.
Haba la kylli na u rangbah la kumba katno snem eiei katei ka jingkieng ka la don, “Ngam kynmaw shuh tangba ka dei ka jingkieng kaba la slem bha” ong u bah Kyrdan, hynrei ha ka jingwad jingtip lyngba ki riew rangbah katei ka thain la ioh jingtip ba katei ka jingkieng ka la don kumba 20 snem tam eiei. Ka dei ka jingkieng nar kaba ki ju ong ka jingkieng doi doi, bad la iathuh ba mynshuwa ka la jot tang ki jaka iuh kjat katba mynta pat ka la jan dkut.
U Rupang u la ioh iakren ruh bad katto katne ngut ki riew paidbah , kivba la iathuh ba lyngba katei ka jingkieng haba ia khein kyllum kumba 30 ngut eiei ki briew kiba iaid lynti lyngba katei ka jingkieng, kynthup ki nongleit bri bad ki ba leit ba wan sha ki shnong ba marjan bad don ruh kiba wan ban ap kali ban kiew sha Pynursla na ki thain ka Pynter.
Phi don ban ong eiei?