ANVC-B, buh ktem sha Garo Hills,ngim ai shi inshi ruh: KHNAM 13 tarik jingialang bad ki nongsynshar shnong ha Nongstoin

Shillong, 7 Jymmang:
Ka seng sain pyrthei Khun Hynniewtrep National Awakening Movement (KHNAM) ka la ieng pyrshah ia ka jingthmu ka sorkar ban buh ia ka ktem ka ANVC-B ha ki jaka jong ka Khasi Hills bad ka ong ia ka ANVC-B ba kan leit buh ktem sha jaka lajong ha Garo Hills ym ban wan buh ktem sha Khasi Hills namar ba ka KHNAM kan nym shah ban ai jaka wat tang shi inshi ruh.
“Ka jingmih khubor ba ka sorkar ka thmu ban buh ia ka ktem ka ANVC-B ha West Khasi Hills, ka pyrshah jur, namar ba kam iahap ban wan buh ktem da kiwei ki briew hapoh u pud u sam ki jaka jong ngi, ka jingthmu barieh ha lyndet ka long ban pynkup bor shuh ban ailad bhan wan skud jaka sha Khasi Hills”, la ong u Bah Latiplang Kharkongor sha ki nongthoh khubor hadien ba la wai ka jingialang kyrkieh ka party.
“Haba ki briew jong ngi ki shah siat iap ha Garo Hills, ym ju iohi ym ju ioh sngew ba kin (ANVC-B) pynrem ia ka jingjia”, la ong u Bah Kharkongor bad bynrap, haba ki ialeh na ka bynta ka roi ka par jong ki Garo, balei kim leit shna krem sha jaka lajong balei kin wan ban buh sha kane ka jaka jong ngi.
“Ka KHNAM ka pyrshah jur ia kane ka jingthmu ka sorkar ban wanrah ia ka ktem katei ka seng lehnoh ha Khasi Hills namr ba kane ka don ka jingthmu sha lyndet ban klun ia ki jaka jong ngi ban shna ia ka Garo Teritorial Council kumba la long ia ka Boda Territorial Council”, la ong u Bah Kharkongor uba dei MDC ka KHNAM na Nongthymmai.
“Ki Garo ki la wan ban skud jaka sha kane ka rilum Khasi namar ba ki la shah noin ha jaka lajong ha kiwei pat ki jaitbynriew. Ka jingwan tuid ki briew ba nabar sha Garo Hills ka long kaba la jur haduh ba ki trai jaka ki Garo kim lah shuh ban iada bad namarkata, ki wan ban skud jaka sha kane ka ri Khasi jong jong ngi”, la ong u Bah Kharkongor bad bynrap, ba lada ailad ia kane ka jingbuh ktem, kin sa kam trai hadien kumba la jia ia ka refugee camp ha Rynjah bad kiwei ki jaka ha kane ka ri Khasi.
“Khnang ba ka jingiakhun kan nym long tang ha ki kot khubor,ngin la iawer ia baroh ki paidbah, khamtam ki nongsynshar shnong, ki syiem, ki sirdar bad ki seng sain pyrthei bad baroh kiba sngew khia ia ka jaitbynriew ban wan sha ka jingialang ban long ha ka 13 tarik Jymmang ha Nongstoin ban iakren ia kane ka kam, la ong u working president ka KHNAM u Bah Adelbert Nongrum.
“Ngi donkam kyrkieh ia ka jingiatylli ka jaitbynriew namar ba la shah khnoit na baroh ki liang. Ngim don hangne ban kren da ka jingsngw shongshit hynrei ban kren da ka jingieid ia la

ka jaitbynriew”, la ong u Bah Nongrum nad bynrap,”Ha katei ka jingialang ha 13 tarik, ngin shim ia ka rai kaei ban leh wat ban ieng pyrshah ia ka rai jong ka sorkar ha katei ka jingialang”, la ong u bah Nongrum.