Angnud ka Gorkha Student Union, ba ki paidbah ka thaiñ Langpih kin shongsuk shongsaiñ

Nongstoiñ: Ki nongialam jong ka Seng Gorkha Student Union kila pynpaw ia ka jingangnud ba ki paidbah ka thaiñ Langpih kin ioh noh ia ka shong suk shong saiñ lyngba ka jingwan jngoh jong ki ar ngut ki Myntri Rangbah jong ki ar Jylla ia ka Langpih ban iakren halor ka jingpynbeit pud.

U Ram Kumar Shrestha, u la ong ba ka Seng, ka kyrmen ba lyngba kane ka jingialang kan sa pynmih ia u soh u ba thiang namar ka Langpih kadei ka jaka ba mih khah khah ki jingiakajia bad ki jingjia kiba sngewsih kaba la ktah ruh ia ka roi ka par ha kane ka thain ba ki paidbah kidei hok ban ioh jingmyntoi.

Ha kaba iadei pat bad ka jingiapynbeit pud u la ong ba ka seng ka shaniah ha ka jingialam jong u Myntri Rangbah ka Jylla Assam u Himantabiswa Sharma ba un shim rai da kaba pyrkhat lang ia ki jaitbynriew kiba shong ba sah ha ka thaiñ Langpih bad u la ong ruh ba ka Seng kan sa peit ia kaei ba ki ar sorkar ki rai ha kaba iadei bad ka Langpih.