Ang lyngngoh ki PSO, ba ki dang hap leit ban pahara ia ki MLA barim

Shillong: Ki don katto katne ngut ki Personal Security Officers (PSO) kiba dang pahara bad bud sah haduh mynta ruh ha kti ha kjat jong kito ki MLA kiba rim kiba la shah rem noh ha ka elekshon MLA 2018. Kitei ki PSO ki la pynpaw ka jinglyngngoh ba ka sorkar kam pat pyllait ia ki na kitei ki MLA barim haduh mynta ruh, wat la mynta la shisnem kim long eiei shuh.
Kitei ki PSO ki la iathuh ba kumba ju long manla ka por haba ki MLA ki la rem elekshon ka sorkar ka ju pyllait noh ia ki da kaba pynmih hukum ba kin leit noh sa sha uwei pat u MLA ne sha kano kano ka kam ba ka tnad pulit ka phah ia ki hynrei kane ka sorkar ba mynta ka khlem pynmhi hukum satia bad kat bym pat pynmih da ka hukum ki ong ba ki hap ban bud beit ia kitei ki briew ki bym don shuh ha ka bor.
Ki la iathuh ba ka kam jong ki (duty) ka la khia bha mynta naba ka jingleit jingwan jong kitei ki MLA barim kam biang por shuh bad kin hap ban bud beit kat shaba ki leit ia ki kam shimet ne kam ing kam sem jong ki. Katkum ka jingtip ba la ioh lum la iathuh ba ki MLA kiba la rem noh kiba dang ioh PSO haduh mynta ruh ki long u bah Pynshngaiñ N Syiem MLA barim ka Mawsynram, u bah Remington Pyngrope MLA barim ka Mawkynrew bad ki dang don sa kiwei pat ruh.