Ambulance ruh ym don, doktor ruh ym don, ujor ki 7 Shnong

Shillong:Ki nongialam shnong jongka shnong Phlangmawprah, Mawphansaw, Mawmynsor, Nongmluh, Mawthungmlang, Phlangdiloin, Pyndensynnia, Rangkhiat bad Thnangbyrniang ki pynpaw iaka jingsngewkhia kaba khraw halor ka jingduna haka jingdon ki nongtrei hapoh ka Wahkaji PHC. Ym tang katta, ki nongialam jong kine ki 9 tylli ki shnong ki pynpaw ruh iaka jingsngewsih bajur ban ioh jingtip bad ban lap ba ka Wahkaji PHC kam don wat tang kawei ka Ambulance ruh watla kane ka PHC ka jngai kumba 40kms tam naka District Headquarter (Mawkyrwat) bad ka hap ban peit iaki shnong kiba kham jngai na kane ka PHC kaba don ha Wahkaji.

Kumba long mynta, kane ka PHC ka dang don tang uwei u MBBS Doctor uba hap peit ia ki jingdonkam jongki paitbah ha ki 30 tam ki shnong bad ym tang katta ka duna ruh haka jingdon ki nongtrei lada ia nujor bad kiwei ki PHC hapoh South West Khasi Hills District. “Ha ka jingpeit jongngi ngi i ba kan long kaba shitom ia ki nongtrei kane ka PHC ban pynbiang wat lada ki trei shitom katno katno ruh” ong ka kyrwoh.

Ka jingbymdon jongka kali kit nongpang ne khamtam ka Ambulance 108, ka pynshitom ia ki paitbah ka thain khamtam ha kine ki por ba ka khlam COVID 19 ka kiew ha ka District bad ka jylla baroh kawei. “Daei yn kit ia ki nongpang ha kane ka por lada donkam ban kit kyrkieh sha ka Corona Care Centre ne sha Mawkyrwat CHC lada ki donkam ka jingsumar ba kyrkieh” la buh jingkylli ki nongialam jong kine ki shnong.

Ki nongialam jong ki 9 tylli ki shnong ki ai ka jingkyrshan ba pura ia ka KSU South West Khasi Hills District bad ka KSU Umdohlun Circle, ha ka jingdawa ban pynbun nongtrei hapoh ka Wahkaji PHC, halor ka jingdawa ban buh ia ka Ambulance 108, ban pynbun ia ki tyndong Oxygen bad kiwei kiwei ki jingdonkam hapoh kane ka PHC, ong ka kyrwoh ba la phah da U Sordar Shnong Phlangmawprah, Bah S.W Thongni, Sordar Shnong Mawthungmlang, Bah P. Thongni, Sordor Shnkng Mawmynsor, Bah T. Lyngkhoi, Sordar Shnong Rangkhiat, Bah H. Wahlang, Secretary Shnong Phlangdiloin, Bah E. Thongni, Secretary Shnong Nongmluh, Bah P.M Paliar, Sordar Shnong Pyndensynnia, Bah A. Thongni, Sordar Shnong Mawphansaw, Bah K. Syiemiong, Sordar Shnong Thnangbyrniang, Bah R. Nonglang.