“Amber, ngan kham lah manga shibun, ban ia uto u tymmen runar” ong u nong Arab, uba tyrwa iapoikha

Ka Amber Heard, ka don ha ka jingdiaw mynsiem kaba khraw ha kine ki sngi, hadien, ba ka la shah rem, ha ka mukotduma iatar kot bad u tnga barim jongka, U Johnny Depp; hynrei hynnin ka sngi, ka la wan ka jingtyrwa kaba thymmai ia katei ka kha iapsaw bad kata ka long, ba uwei u briew na Saudi Arabia, ula tyrwa ban ia poi kha noh bad ka. Ia katei ka jingtyrwa, ula phah da ka video, sha ka instagram bad ba u da kob ruh bad ong “Ngan kham lah manga shibun, ban ia uto u tymmen runar”.

“Amber… baroh ki jingkhang, ki la khang lut iaphi, phim don shuh mano mano, na ka bynta jongphi. Nga la peit pha, ba ki don ki briew kiba isih bad kiba kren bein iaphi bad kumta, nga la rai ban ia poi kha noh bad phi. Ai ba u Allah, un kyrkhu iangi baroh arngut. Phi dei ka jingkyrkhu, hynrei ki briew, kim iohi satia ia kata. Nga kham lah manga shibun, ban ia uto u tymmen runar” ong utei u nongkren, ha kaba la pynkylla ia ka jingkren jongu sha ka English, da ka Gulf News.