Aiu ki thoh ha ki lyngkdop ba wan bret sha ing mane?

Shillong, 8 Iaiong:
Ha ka sngi u Blei, la lap ia ki song kiba la song ia ki kot lyngkdop bad la wan bret ia kitei ki song ha ar tylli ki ing mane Presbyterian ha ka balang Baniun bad ha ka balang Sadew , haba pynkylla Khasi ia kitei ki jingthoh kumba la thoh ha kitei ki koy lyngkdop , ha jrong duh jong ka jingthoh la thoh “Ka Bio Microchip bad ka dak jong u mrad khlaw ( Jingpynpaw 13:15-18)”. La pyni ia u nombar 666 bad la thoh biang “U nombar 666 u dei u bym lah ban iohi da ki khmat briew, namar u dei u nombar uba leh lyngba ki kompitor”.
Ha katei ka jingthoh la batai shaphang kata ka Bio- Microchip, kaba batai ia ka jingheh jingrit jong u, kumno la pyndon kam ia u da kaba ksam ha ka doh ki briew kum ha shyllang mat ne ki ksang kti ha ki bynta ba shadien bad kaei ka jingtreikam uta u Bio Microship, ha kaba nangne shakhmat la thoh bay m donkam shuh ban pyndonkam ia kita ki Passport, ki Debit Card, ki Passbook, ne ka cheque tang uta ka la biang, bad ha ki sngi ban sa wan la thoh ha katei ka kot ba uwei pa uwei u dei ban leh ia uta u Bio Microchip bad lada um leh yn kem ia u bad yn khein ba u dei u nongpynkhein ain.
Nangta la batai shaphang u Aadhaar nombar /Unique Identification ( UID) nombar ha kaba la ong ba u dei u nombar uba pyndonkam ha India uba dei u nombar uba lah ban buhrieh ia ka jingim shimet u briew. La thoh ba ka jingpyntreikam ia utei u nombar kan wan ha ka dur jong ki kam pynroi bapher bapher , bad da ka jingpyndonkam ia utei u nombar kan ym don shuh ka jingdonkam ban peit ia ki kot ki sla lane kiwei pat ki jingpynshisha, tang utei la biang.
La batai shaphang kita ki Barcode kiba ha u briew ki don lai jait la ong, u Barcode, u OR Barcode ( Quick Response Barcode bad Bio Microchip. La batai shuh shuh ba khlem utei u UId nombar ki nongleit jingleit kin ym lah ban thied ia ka tiket liengsuin , tiket rel lane ki tiket bus jong ki ban iaid na kawei ka jaka sha kawei pat, ki nongai wai ing, ki Hotel kin ym ai jaka ia ki briew ki bym don ia utei u nombar lane ym shah ba kin thied jingthied ne die jingdie, ym shah ba kin sei lane thep pisa hapoh bank khlem da ioh ia utei u nombar lane ban ia don bynta ha kino kino ki kam paidbah, la batai ha katei ka kot kaba ym shym la don ba soi kyrteng hynrei la shu pynhap btuk ha ar tylli ki ing mane Presbyterian.
Ha ki bynta ba shadien jong katei ka jingthoh bun ki kyntien ba la thoh la sot na ka ktien bible ha kaba la ong ba kitei ki jingpynkhreh ban pyntreikam ia ki nombar baroh ki dei kiba la iathuh lypa ha ka Bible na bynta kata ka jingwan synshar jong u mrad khlaw. Ka bynta ba la shim na ka bible ha katei ka jingthoh la thoh kaba la shim na ka Jingpynpaw 13:18 “Hangne don ka jingstad. Uta uba don kata ka jingshemphang, to un khein ia kata ka jingkhein uta u mrad khlaw; namar ka long ka jingkhein u briew: bad kata ka jingkhein jong u ka long , ‘Hynriew spah hynriew phew hynriew’.”
Shuh shuh la thoh ba u nombar 666 u ieng na bynta ka dak lane ka kyrteng lane u nombar jong u mrad khlaw. La batai ba dei tang u nombar 6 uba lah ban treikam ha ka jingpyntreikam ia kitei ki lai tylli ki Code, u Barcode, u RQ Code bad u Bio Microchip, la thoh ruh ba ka don ka jingkhein kaba lah ban pyntreikam da ki kompitor kiba khlain bor bad kumjuh ruh da ki kompitor paidbah, ha kaba la batai ba ia katei ka jait jingkhein la lap da uwei u Saiantis uba la tip kyrteng kum u George Joseph Laurer ha u snem 1971, la thoh ba ka jia ryngkhat ruh ba baroh lai kyntien ki kyrteng utei u saiantis ki wan mar mar hynriew dak ( 666). Labatai ha ka jingthoh ba utei u saiantis u la ong ba dei tang u nombar 666 uba lah ban pyndonkam ha katei ka jingkhein kaba u la shem, bad ym lah ban treikam da kiwei pat ki nombar lait noh u 666, ia ka kyrteng , ki dak shynpriah kti la buh ha UID card tang da ka jingkhein 666, ong katei ka jingthoh.
Haba kut jong ka jingthoh la thoh biang, “Kam don jingartatien shuh ia ki sngi jong ka jingsynshar u mrad khlaw ha kine ki sngi, Kino kino kiba pdiang ia u chip lane UID nombar ki la mane ia u mrad khlaw, kumta ki la long kiba la khreh ban ioh ia ka jingbitar u Blei” la bthah ha katei ka kot ba ki nongpule kin peit ia ka Jingpynpaw 14:9-11.
La pynkut ia katei ka jingthoh ruh da ka ktien na ka bible kaba la shim na u Loukas 8:16-17 kaba ong, “Bad ym don u briew haba u la thang ia ka sharak , uba tap ia ka da u khiew, lane uba buh hapoh ka jingthiah : hynrei u buh ha ka dieng pynieng sharak , ba kita kiba rung shapoh kin iohi ia kata ka jingshai. Naba ym don eiei ba la buhrieh, ia kaba yn ym pynpaw “lymne eiei kaba rieh , ia ka ban ym tip bad ka ban ym paw”. Katei ka jingthoh shuwa ban pynkut ka la da kitei ki ktien ka la bthah ia kiba pule ba kin pynphriang ia katei ka khubor sha kiwei pat.